Bookbox › Набрзинка

7 големи кражби на книги

7 август 2022

Во текот на историјата кражбата на значајни книги или ракописи биле чести. Некои од нив не се пронајдени до ден денес. Меѓу нив е необјавената проза на Ернест Хемингвеј, која во 1922 исчезнала додека авторот бил во Швајцарија од каде требало да известува за меѓународна конференција. Неговата сопруга, Хедли, планирала да му се придружи од Париз за да одат на скијање. Ги спакувала ракописите во куфер, меѓу кои и обид за роман во врска со неговите искуства од Првата светска војна. Но по пат куферот бил украден. Хедли доживеала мал нервен слом, а Хемингвеј најверојатно ја удавил тагата во уште едно виски.
Првиот роман на Малком Лоури, авторот на „Под вулканот“ по којшто е снимен и истомениот филм на Џон Хјустон со Алберт Фини, се викал „Ултрамарин“. Ракописот за него бил украден заедно со акт-чанта од автомобилот на неговиот издавач. Не е јасно како била објавена книгата по овој факт, бидејќи чантата никогаш не била пронајдена. Наводно некој пријател ја спасил претпоследната верзија од ѓубре.
Во 1918, пријател на Волт Витман предал на Конгресната библиотека збирка од 24 тетратки кои му припаѓале на авторот. Тие содржеле белешки од времето кога Витман работел како болничар во текот на Граѓанската војна. Во 1942 тие, заедно со други предмети, биле испратени во Охајо, за да бидат чувани таму во текот на Втората светска војна. Неколку години подоцна, кога материјалите биле вратени, тетратките ги немало. Печатот на кутијата не бил скршен, што сугерира дека делата биле украдени пред таа воопшто да биде испратена.

Уште неколку примери за книжевни кражби на линкот.

извор

Иво Бару е победник на државното првенство во Катан и оди за Португалија

28 септември 2026

Вчера, 27 септември, Иво Бару ја освои титулата на „Државното првенство во Катан 2026“. Шампионатот се одржа во новоотворениот простор за друштвени игри „Рулбук“ во Скопје, а турнирот беше организиран од „Гоблин“. На масите се собраа 64 играчи, кои повеќе од десет часа се натпреваруваа за титулата најдобар играч на „Catan“ во земјава.
Победата има и дополнително значење бидејќи со неа Бару добива можност Македонија да ја претставува на европската сцена. Како национален шампион, тој ќе настапи на CATAN European Championship 2026, кое во ноември ќе се одржи во Португалија. Според официјалниот систем на CATAN, националните првенства се патот преку кој играчите се квалификуваат за меѓународните натпревари, а шампионите добиваат можност да се борат со најдобрите играчи од другите земји.
Иво има пишувано во нашата подрубрика Букбокс друштвени игри, осврт под наслов „Фотосинтеза или како да не бидеш 'дрво' за садење дрвја“.

извор

Чуму слобода?: фестивал Букстар од 28-30 септември во Скопје

23 септември 2026

Од 28-30 септември на повеќе локации во Скопје ќе се одржи 12-тото издание на фестивалот Букстар. Тој оваа година го отвора прашањето ЧУМУ СЛОБОДА? односно FREE AT LеAST?, инспирирано од зборовите на Мартин Лутер Кинг Јуниор: „Никој не е слободен сè дури сите не сме слободни“. Во време кога границите – видливи и невидливи – повторно се појавуваат околу нас, книжевноста останува простор во кој БАРЕМ мислата може да се движи без ограничувања, велат организаторите од издавачката куќа „Антолог“.
На 28 септември од 18:30 во Лабораториум ќе се одвива разговор со неколку македонски писатели со модераторката Фросина Пармаковска на тема „Од робот до четбот: дискусија за ерата што доаѓа“.
На 30 септември во Europe House во Скопје, со почеток од 16 часот ќе се одржи мал омаж во кој уредници на четири издавачки куќи и познавачи на творештвото на неодамна починатата иранска авторка Марџан Сатрапи ќе се осврнат на нејзиното творештво, а модератор ќе биде Ивица Дукоски. Истата вечер од 19 часот е предвиден разговор со Ѓузел Јахина, авторка на „Зулехја ги отвора очите: патување во еден книжевен универзум“.
Помеѓу гостите на фестивалот е и најчитаниот шпански автор Елој Морено. Во 2025 година, заедно со илустраторот Давид Сиера, тој ја објави „Новото патување на Малиот принц“, продолжение на „Малиот принц“. Покрај тоа, шпанскиот автор на 8 февруари 2025 година го собори Гинисовиот светски рекорд за најмногу потпишани книги во 12 часа, со неверојатни 11.088 потпишани книги.

Целосната програма и списокот на учесници се достапни на социјалните мрежи на Антолог.

извор