Неколкумина што ја прочитале внимателно енцикликата „Magnifica Humanitas“ забележуваат дека многу пасуси, па и цели делови биле генерирани со помош од вештачка интелигенција, која папата во истиот документ ја посочува како закана за човечкото достоинство.
Дури и пасусот „Ниеден компјутерски систем, колку и да е софистициран, не може да создаде срце кое се предава себеси или совест која разликува добро од зло“, всушност бил напишан од алатка, иако личи како да е од теолог, тврдат истражувачи.
Енцикликите се официјални писма на папите до бискупи ширум светот, но често се наменети и за „сите луѓе со добра волја“ како насока од Римокатоличката црквата за важни морални, социјални или теолошки прашања. Оригиналот вообичаено е напишан на латински јазик (за бискупите) и е преведен на италијански, шпански и англиски, за да може да ја прочитаат и верниците.
Компјутерскиот истражувач Линч Жанг го забележал препознатливиот стил на јазичните алатки во делови од англиската верзија. Корисникот Кartr на X тврди дека италијанскиот текст има досега најголема содржина генерирана со ВИ од сите досегашни преводи објавени од Ватикан, шпекулирајќи дека тоа е оригиналот.
Италијанскиот текст на енцикликата бил проверен со софтверот Pangram за откривање делови генерирани со ВИ. Софтверот покажал дека Воведот бил 43% генериран од ВИ, вклучувајќи најмалку седум пасуси во целост. Јазичен модел бил автор и на 62% од текстот на првата глава и на 18% до 41% од другите глави, односно на 43% од целата енциклика.
Иронијата ја забележал и моделот Клод, кој во улога на рецензент наоѓа и оправдувања за користењето на ВИ во составувањето на документот.
Ставот 100 наведува дека употребата на вештачката интелигенција како алатка несомнено го олеснува животот и не ја забранува употребата, туку предупредува за преголема зависност. Ако теолог го составил аргументот, а моделот ја проверил граматиката и ја разубавил прозата, документот тоа го дозволува. Нема проблем сè додека моделот не генерира суштинските теолошки тврдења, коментира Клод.
Сепак, алатката забележува отстапување од ставот за транспарентноста во алгоритамските процеси, кое е присутно во енцикликата како „предуслов за доверба“.
Документ што ги поставува тие барања, а самиот не ја открива улогата на ВИ во неговото составување е во различна позиција од оној во кој чесно е наведено дека е напишан со помош од ВИ, забележува моделот.
