Радио Андалус, официјалната радио станица на Ал-Шабаб во објавата за забраната наведе дека фрлените пластични кеси „претставуваат сериозна закана за добробитта и на луѓето и на животните.“
Џихадистите не застанаа само кај кесите, па воведоа и итна забрана за сечење на локалните дрвја. Како точно ќе се спроведува забраната, ќе биде дополнително објавено.
За експертите на тема тероризам ова е обид на Ал-Шабаб да покаже дека може да имплементираат закони и да владеат со територијата како и секоја легитимна влада, посебно откако други влади од источна Африка почнаа да воведуваат ваква забрана.
Инаку до сега на списокот забранети работи од Ал-Шабаб се: западна музика, кино, сателитски антени, смартфони, оптички интернет и хуманитарни агенции.
Групата која е вклучена во некои од најбруталните напади во источна Африка во изминатите години, во кој само во еден во Могадишу загинаа 500 луѓе, исто така е и значителен столб на трговијата со слонова коска во Африка со што ги финансира своите активности.
Изминативе години џихадистите колку што не покажуваат интерес за човечко достоинство и живот, толку знаат да изненадат со еколошки активизам. Во 2016, ал-Каеда го критикуваше Обама дека само зборува а ништо не прави за заштита на природата и спречување на климатските промени. На почетокот од годинава талибанското министерство за земјоделие на своите симпатизери им нареди да почнат да садат дрвја низ Авганистан „за разубавување на Земјата и за добробит на креациите на семоќниот Алах.“
