Комунизам, последниот уплав на американската армија

Тоа што американската армија одлучи да попушти и да направи отстапки и да дозволи служење војска за хомосексуалци, жени и трансродови лица, никако не се преточи во добра волја кон луѓето со поразлични идеологии од нив, барем не кон оние што се залагаат за комунизам.

Дипломец на Вест поинт, една од најврвните воени академии во САД, кој на Твитер објавил своја слика со пораката „комунизмот ќе победи“ и слика од церемонијата за дипломирање на која носи маичка со Че Гевера (под униформата), е отпуштен од американската армија. На разрешувањето на дипломецот му претходеле навреди па дури и смртни закани.

Расчинетиот Спенсер Рапон изјавил дека истрагата околу него открила дека тој на интернет се залагал за социјалистичка револуција и омаловажувал високи американски офицери и функционери.

По отпуштањето Рапон продолжува по свое порачувајќи „Јас се сметам себе си за револуционерен социјалист. Ги охрабрувам сите војници кои имаат совест да го спуштат своето оружје и да ми се приклучат на мене и на многумина други кои се подготвени да престанат да им служат на агентите на империјализмот и да ни се приклучат во револуционерното движење.“

Фотографиите се направени на денот на дипломирање во мај 2016, а Рапон решава да ги сподели во 2017 како поддршка на НФЛ играчот Колин Каперник и неговото клечење за време на американската химна.

Откако не успева да влезе во Вест поинт по завршување на средно училиште во 2010, како еден од најдобрите ученици во училиштето и со препорака од тогашниот конгресмен од Пенсилванија, Рапон се пријавува во војска и служи една година во Авганистан. По завршување, тој дознава дека Вест поинт има програма за примање војници кои служеле во странство и така влегува во академијата.

За случајот со Рапон се огласија и некои од најзвучните имиња од американската политика, како републиканскиот сенатор Марко Рубио, кој го повика американскиот секретар за одбрана да го отстрани Рапон од армиските офицери заради неговите про-комунистички ставови и залагањето за политичко насилство.

20 јуни 2018 - 10:59