До 2015-та, светскиот пазар на козметика против стареење (cosmeceuticals) - креми, серуми и слични мелеми, се очекува да вреди околу 114 милијарди долари. Во 2005-та истиот вредеше 1,15 милијарди.
Американскиот закон прави разлика меѓу лекарство и козметика, и во основа се додека производот или маркетингот за него не тврди дека тој лекува, спречува или е терапија за некоја болест, или на кој било начин влијае на структурата и функцијата на телото, тој се смета за козметика. Ако нешто се смета за козметика тоа значи дека производителот не мора да докаже дека неговиот производ може да ги направи сите работи за кои тврди дека може да ги направи.
Затоа што не постои ваква регулација, производите против стареење се преполни со најразлични "активни" состојки кои имаат магични својства. Избегнувањето одговорност е надополнето со внимателно избрани зборови од типот на "намалување на појавата," на брчки или оштетеност од сонце, или општо "промовирање" и "зголемување" на производството на колаген. Некои и тврдат дека се "подобри од ботокс," и покрај тоа што ботоксот е невротоксин кој е одобрен како терапија против брчки од ФДА (агенцијата за лекови).
Списанието Пацифик Стандард објаснува дека иако постојат научно докажани третмани за кожа, за нив обично е потребен рецепт. Овие третмани треба да исполнат два клучни предуслови пред воопшто да се појават во јавност:
- да ги минат сите тестови наметнати од ФДА што важат за сите лекови
- треба да се има предвид дека кожата е неверојатно добра природна бариера, дури и за корисни состојки кои природно се наоѓаат во телото. Заради ова сите креми кои се издаваат на рецепт мораат да докажат дека нивните активни состојки навистина можат да влезат во кожата во доволно голема доза за да имаат физиолошки ефект и да да дадат резултати.
За разлика од нив козметиката против стареење не мора да докаже ништо од ова.
"Може да се рекламираат како 'клинички докажани' или 'препорачани од дерматолози,' ама овие термини немаат никаква стандардна дефиниција на ниво на индустрија. И бидејќи најголемиот дел од производителите агресивно ги штитат своите производи со патенти или закони кои ги заштитуваат трговските тајни, потрошувачите немаат како да знаат што има во нив и како тие се тестирани.
За да си дадат некаков легитимитет во отсуство на вистинска информација, индустријата паметно почна да привлекува дерматолози, акредитирани доктори кои се поврзуваат со индустријата за убавина како платени консултанти или клинички истражувачи. Ова е незамислив конфликт на интереси, и е спротивен на сите етички медицински правила, како што можат да потврдат некои од оваа област," пишува Зен Лиу во текстот за Пацифик Стандард.
Истражување од 2010-та покажува дека 35% од жените избираат производи за кожа врз основа на "препорака од дерматолог," а 50% веруваат дека ако нешто е "дерматолошки тестирано" тоа сигурно функционира. Журналот на американската медицинска асоцијација Дерматологија, го објавува писмото на дерматологот Ернст Епстајн под наслов "Дали сме консултанти или торбари?"
"Има цена што ја плаќаат дерматолозите кои продаваат козметика... тоа е нашиот интегритет... нашите пациенти кои се преплавени од реклами кои ги промовираат специјалните квалитети на хидрантите креми, ноќните креми, обновувачите на очниот капак и останати магични подмладувачи на кожата. Научно, сето ова се глупости; знаеме дека иако некои од овие препрати може привремено да ја освежат кожата малку подобро од некои други, разликите се тривијални и привремени."
На пример Лореал, најголемата козметичка група на светот, од продажба заработува 30 милијарди долари годишно. За првата половина од 2014-та имаат потрошено 450 милиони долари на истражување и развој на производи, и над 4 милијарди долари на реклами и промоција.
"Очигледно трошењето на речиси 1 милијарда долари годишно на истражување може да генерира доволно докази за да ги осигури потрошувачите дека нивните производи функционираат, ама не доволно да за ги исполни стандардите на ФДА за докажување на тврдењата.
Рекламите ги опишуваат нивните производите дека имаат способност, на пример, да го променат изразот на гените во кожата и да поттикнат производство на колаген, и блокирање на процесот на стареење, па дури и да доведат до слабеење. Под закана за правна постапка, на производителите им беше наредено да дадат докази кои ги потврдуваат нивните тврдења и да ги дадат производите на тестирање од страна на ФДА, или комплетно да се откажат од овие тврдења.
Сите компании се одлучија за втората опција," пишува Зен Лиу.
