Во тригодишен истражувачки проект Елке Гаугеле, професорка на Академијата за ликовни уметности во Виена, го анализирала развојот на стиловите на облекување во десничарски екстремистички кругови од 1989 година наваму.
Проектот бил финансиран од Австрискиот фонд за наука со приближно 400.000 евра од јавни средства.
Главниот заклучок е дека денес е значително потешко да се поврзе облеката со одредени политички милјеа. Според професорката, разликите во определбите може да се забележат само преку поединечни симболи, специфични фризури или ситни препознатливи белези.
Стиловите на екстремната десница се крајно паразитски. Тие се засноваат на копирање и крадење, тврди Гаугеле.
Нејзиниот тим посетил модни бизниси во Австрија, Германија и САД, интервјуирал вработени и анализирал онлајн материјали и архиви со слики.
Гаугеле издвојува етаблирање на два главни тренда на уличната мода кај мажите. Едниот фаворизира дуксери и спортска облека, кои го истакнуваат бунтовничкиот дух, а другиот е ненаметлив стил, како поло маиците, кој професорката го поврзува со „богатство и припадност на социјалните елити“.
Во модната понуда за жени, стилот на „традиционална жена“ Гаугеле го поврзува со следбеници на американското движење MAGA.
Активизмот преку модата, убавината и запознавањето е силно поттикнат од американската „техно-десница“, односно од десничарските групи наклонети кон технолошката индустрија, заклучува професорката на Австриската академија на ликовни уметности.
Да потсетиме. Истражувањето е финансирано со 400.000 евра од австриските даночни обврзници.
