Душан Ковачевиќ

Младите никогаш нема да се вратат во земјата во која омразата се негува како цвеќе

По повод обидите за реафирмација на 30 години стариот Меморандум на Српската академија на науки и уметности, еден контроверзен спис кој своевремено послужи како физибилити студија за пеколниот проект во кој изгоре Југославија.

Денешните приказни, расправи, полемики и "најнови толкувања на Меморандумот" нè враќаат во минатото и времето на партиски, идеолошки, комитетски, полициски, безбедносно-разузнавачки и меѓунационални пресметки.

Меморандумот одамна требаше да биде гајле за луѓето задолжени за вистините од минатото - историчарите.

Преиспитувањето на Меморандумот е само дел од новите и опасни игри на разно-разни манипулатори во Србија и вон српските граници.

За жал, како и пред 30 години, тој недовршен спис за "положбата на српскиот народ во Југославија" служи за дневно политички расправи, пресметки, обвинувања и докажувања на "вината" на поедини "белградски интелектуалци" во подривањето на земјата која беше на издишување.

Приказната за Меморандумот денес - после сето она што се случи во 90-тите години - е уште еден обид за "дијагностицирање на причините" на болестите од кои умре Југославија; што тоа и кој тоа ја разболе таа голема и убава земја за да исчезне во огинот од кој и беше создадена.

И тие расправи ќе ги има и во иднина, сè додека луѓето - главно политичарите - не сфатат дека дување во пепелта на штотуку изгасената куќа е опасно и погубно по кревкиот мир меѓу земјите кои до вчера војуваа.

Поедини "раководни луѓе" наместо да бидат пожарникари, со грда и цинична страст ја презедоа улогата на пиромани.

Истовремено, од просторите на поранешна Југославија, од новонастанатите држави, со автобуси, возови и авиони заминуваат млади луѓе желни за подобар живот и мир за иднината на своите деца.

Младите заминуваат и веќе никогаш нема да се вратат во земјата во која омразата се негува како цвеќе.

И во тие нови, етнички чисти земји ќе останат главно бесни старци кои ќе се враќаат и ќе се тепаат со стапови, штаки и протези.

И минатото ќе им биде единствената иднина.

Душан Ковачевиќ

* За Меморандумот на САНУ

18 септември 2016 - 15:17