Ерик Максим Чупо Мотинг мижеечки ја дава оваа, па и Дејви Главевски сега на 53 години.

Јунак на денот, неделата, месецот, годината, па и деценијата. Фабио Канаваро гледа и се гордее. Малдини исто. Па ова на голман му нема успеано.

„Ние Македонците сами си се крадеме. Реагирав кон судијата, дали има очи да види што се случи, а тој ми вели `молчи, оти ќе те истерам`. Мене да ме истера, оти тој не досуди офсајд од четири метри. Косата си ја откорнав од нервози“.

Голден Стејт Вориорс копаше низ историјата за да открие дека скоро 50 години ниту еден друг нивни кошаркар не постигнал толку поени. Стефон Кари синоќа не знаеше за доста.

Александар Трајковски на клупа го преседе цел меч меѓу Овиедо и Мајорка, конечни 2:2, ама бар имаше што да види. Неговиот колега Хоан Састре испука проектил од крајот на светот, а ќе речеш бекче е, сигурно ќе ја подаде.

На толку чуда од голови и потези, еднаш и Лео да направи некој пацерски потег на кој му пукаат сеир. Инаку она што е поважно е што не се посрамотија како против Еибар и ја совладаа Хуеска 0:1 со голот на Де Јонг.

Во зимска снежна идила, Арсенал се отвори на гостувањето против ВБА со 0:4. Лаказет даде два гола, Сака еден, ама сите зборуваат за солото на Шкотланѓанецот Тирни кој целосно го избезуми чуварот. Врвна игра со лева па со десна, па уште и јака завршница.

Иако сме навлезени само во вториот ден од новата година, сепак силно веруваме дека Германците во 2021-ра нема да видат уште едно вакво ремек дело. Надием Амири од Баер Леверкузен изведе две магии кои не знаеме како да ви ги опишеме. Едноставно се надмина себе си.

Македонската фудбалска репрезентација во ноември 2020 обезбеди историски прв пласман на Европско првенство 2020. Со триумфот над Грузија во финалето од плејофот на Лига на нации, со голот на капитенот Пандев, македонските фудбалери ни приредија огромна радост. Тоа со сигурност беше настан на годината 2020 во Македонија.

Ништо не му значат тие 36 години бидејќи дечкото за фудбал користи мозок. Во неговите игри владеат интелигенција и елеганција. Едноставно Андрес е уметник со топката и на Јапонците треба да им е чест и привилегија што го имаат во залезот на кариерата.

Само три асистенции му фалеа на Лука за да ја стартува годината во трип дабл. Словенецот го заврши мечот со 25 поени и 15 скокови за триумф на Далас над Мајами од 93:83. Потегот на вечерта го направи во дуел со Бам Адебајо кој не знаеше што го снајде.

За оваа година нема правење топ листа на успеси во македонскиот спорт. Таа мина во знакот на само еден за кој се погрижија јунаците кои докажаа дека и во фудбалот можеме и заслужуваме да се најдеме на европската мапа. Со срце и од срце ја исполнија мисијата.

Ова го има само кај него во двор и во Русија, толку.

Реал синоќа одигра само 1:1 на гости против Елче, а покрај резултатот еден од домаќините си направи и личен ќеиф на душа што успеа да го насамари еден од најславните бекови.

Го чекавме, сонувавме, мечтаевме 27 години и ете го дојде тоа пусто Европско кое мислевме дека ќе биде недостижно уште долго. Благодариме Горан, Елиф, Нестор и до сите кои се вратија херојски од Тбилиси. Па нема послатка акција од оваа годинава.

Во француската Лига 1 има 20 клуба. Нант после 17 кола е 16-ти со учинок 3-6-8 и ако остане вака ќе се борат за опстанок. Навивачите протестираат и бараат оставка од управата која пред недела дена го назначи за тренер, замислете, астрологот Рајмон Доменек кој се враќа во француски клупски фудбал после 27 години.

Лудиот Тициано Крудели, она италијанско чиче со бркчиња што сигурно некогаш сте го слушале како урла на голови на Милан, сега како да има замена. Се вика Мауро Зума, работи како контент советник на Милан ТВ каде одвреме-навреме коментира.

Во 32. коло од бразилската Серија Б, Хувентуде победи 2-1 против Понте Прета. Првиот гол за домаќинот, од стрелецот Рожерио слободно може да се одбере за најспектакуларен на сезоната.

2020-та во суштина е чкарт година по многу основи, но не и за еден Бразилец на кој му се случи врвот на навивачките задоволства. За некој можеби ова го има само во бајките, но тој го доживеа вистински.

Во последниот меч од 2020-та година Лидс Јунајтед не остави камен на камен од Вест Бром на Сем Алардајс и ги прегази со 0-5. Нашиот репрезентативец Алиоски постигна супер гол.

Саутемптон и Вест Хем одиграа без голови, па момент од мечот за кој најмногу се зборува на социјалните мрежи е страшниот удар кој стоперот Крег Доусон му го зададе на Че Адамс.

Некој можеби подзаборавил кога Паоло Ди Канио во 96-та направи трансфер од Милан во Селтик. Речиси да нема клуб за кој нема постигнато посебен гол по кој паѓа во транс и тој и коментаторот и навивачите. Со интелигенција до понижување на голманот.

Дигиталниот магазин за домашен фудбал „Footbla Digital“ ги собра на едно место најјаките голчишта од полусезоната во првата македонска лига. Компилацијата е доста богата и атрактивна, па така на пример Клисман Чаке се истакна како Кварезма, а Нијаз Лена се претвори во Жунињо.