Роберто Манчини и Зенит доаѓаат во Скопје на 14 септември

По извлекувањето на денешната ждрепка во Монако, кусо време откако Вардар ги доби противниците во групната фаза од Лига Европа, го дозна и распоредот за натпреварите.

 

Летната фудбалска треска во Македонија брзо ќе продолжи и тоа на најспектакуларен можен начин. Првото коло се игра за само 20 дена, а Вардар е домаќин. На Телеком арената доаѓа руски Зенит, најтешкиот противник во групата Л кој беше во првиот шешир.

 

Се работи за петкратен првак на СССР/Русија (1984, 2007, 2010, 2011–12, 2014–15) кој во 2008-ма го крена пехарот во тогашниот Куп на УЕФА, а потоа и во Супер Купот на Европа. Прво го совладаа Глазгов Ренџерс со 2:0, а потоа и Манчестер Јунајтед со 2:1 кој беше освојувач на ЛШ.

Нема потреба многу да се зборува за моќта на Зенит кој од 2005-та е под спонзорство на нафтениот гигант Газпром и кој според Трансфермаркет има вредност од 120 милиони евра, па затоа еве уште само неколку куси информации.

 

Во Лига на шампиони имаат три пласмани во топ 16 (2011–12, 2013–14, 2015–16), а сезонава во домашното првенство се први на табела со 6 победи, едно реми и ниту еден пораз. Гол разлика: 16:3.

 

Летово за нов тренер го назначија Роберто Манчини, а одбраната ја засилија со Бранислав Ивановиќ.

Доста е за Зенит. Вардар не се занимаваше со буџетот и имињата на Фенербахче, па ете што ги снајде. Тоа многу добро го знае и ЦСКА Москва.

 

Одиме со распоредот и нека е со среќа во долгата европска авантура. На Фејсбук веќе почна собирот.