Сините од Лондон беа во доста незгодна положба на вчерашната ждрепка за Лига на шампиони затоа што чекаа само три можни противници. Го посакуваа Бешикташ, а се молеа да избегаат од ПСЖ и Барса.
Арно ама ја добија можеби најтешката пречка за поминување во осминафиналето, а паралелно со тоа и најтешкиот распоред за играње во деновите кога треба да се размслува како да се урна Барса.
Челси има пеколно тешки 23 дена во кои има само еден лесен противник, а тоа е Кристал Палас. Другите четири пресметки им се како да играат финалиња.
Најсериозниот тест во сезоната им почнува на 20 февруари кога на Стемфорд Бриџ ја пречекуваат Барселона. Што и да направат на овој дуел, треба да бидат максимално сконцентрирани за следните две пресметки во Премиер лигата.
И двете се ем ултра тешки, ем на гости во ист град, против екипи кои претендираат за врвот. Прво му гостуваат на едниот Манчестер, а потоа на другиот и откако ќе го пречекаат Кристал Палас, следува реваншот во топ 16 фазата од ЛШ, кој веројатно ќе биде клучен дали ќе продолжат во Европа.
Челси во домашното првенство заостанува 3 бода зад Јунајтед и 14 зад Сити, а во Лига на шампиони треба да го бара лекот за Меси и компанија. Третата опција им е да оди само на ФА или Лига Куп.
Од резултатите на овие мега дуели, веројатно ќе зависи дали темпераментниот Конте ќе треба повторно да прави трансплатација на косата.
20 февруари: Челси - Барселона (Осминафинале ЛШ, прв меч)
24 февруари: Манчестер Јунајтед - Челси (Премиер лига)
3 март: Манчестер Сити - Челси (Премиер лига)
10 март: Челси - Кристал Палас (Премиер лига)
14 март: Барселона - Челси (Осминафинале ЛШ, втор меч)
