Дарко Панчев во друштво на Левандовски, Стоичков и Шукер

Репрезентацијата на Данска во 1992. година директно од плажа стигна до трофејот на ЕП во Шведска, затоа што Југославија поради трагичната војна во тој период доби санкции и не можеше да игра на Европското иако обезбеди пласман преку квалификациите. Данска претходно не обезбеди пласман, но ја повикаа да учествува наместо Југославија која доби санкции од Обединетите нации.

 

На селекцијата која осум години претходно стана светски јуниорски првак, некој ѝ го одзема правото да игра на големиот турнир во Шведска.

 

Легендата вели дека селекторот на Данска, Рихард Мелер Нилсен се подготвувал да ја реновира кујната, а данските репрезентативци воглавном времето го проаѓале на плажите кога УЕФА одлучила една од двете репрезентации кои биле на стенд-бај да игра на ЕП 1992.

 

Ивица Осим низ квалификациите ја водеше неверојатната генерација која во 1990. година стигна до четвртфиналето на СП. Во квалификациите за Европско 1992. година, Дарко Панчев и другарите загубија само еден меч а токму Кобра постигна 10 голови и беше најефикасен играч во тој циклус. Од 20 голови на Југославија во квалификациите, Панчев постигнал половина. Скопското дете ги тресеше мрежите на Северна Ирска (1 гол на гости), Австрија (3), Северна Ирска (3 дома), Данска (1), Фарски Острови (2).

Со оглед на околностите, селекцијата се менуваше но од почеток до крај играа фудбалери од Македонија, Србија, Црна Гора, БиХ, Словенија. Сречко Катанец (подоцна селектор на Македонија) играл до крајот на 1990. година, играчите од Хрватска Јарни, Вулиќ, Бобан, Просинечки и Шукер последен пат настапиле во мај 1991. година, а Словенците Новак и Миланич останале до крај. Последниот меч Југославија го одигра во Амстердам, на 25. март 1992. година.

Три недели пред почетокот на Европското, селекторот Ивица Осим се повлече, а фудбалерите од БиХ решија да не играат на Европското. Меѓу играчите кои не отпатуваа беше и нашиот Дарко Панчев.

Новиот селектор, Иван Чабриновиќ ги однесе во Шведска фудбалерите: Омеровиќ, Лековиќ, Петковиќ, Јаковљевиќ, Крстанојковиќ, Миланич, Новак, Петриќ, Дубајиќ, Најдоски, Вујачиќ, Радиновиќ, Јокановиќ, Југовиќ, Брновиќ, Савичевиќ, Стојковиќ, Михајловиќ и Мијатовиќ.

Европското почнало на 10. јуни, само 12 дена по одлуката на Обединетите нации да ѝ воведе санкции на Југославија, одлука поради која УЕФА ја прати дома селекцијата која беше прва во групата. За парадоксот да биде поголем, Данска го освои првенството и се качи на врвот на Европа.

На листата најдобри стрелци во еден циклус подоцна се менуваа неколку играчи. Веќе во квалификациите за ЕП 1996, Христо Стоичков постигна исто 10 голови. Во квалификациите за ЕП 2008, Дејвид Хили стана неприкосновен лидер меѓу стрелците во еден циклус за Европско првенство. Хили со 13 постигнати голови во квалификациите за ЕП 2008 го помина рекордот на Давор Шукер и Клас-Јан Хунтелар кои имаа по 12 голови.

 

Северно Ирецот Хили (36) за време на оваа кампања изјави дека очекува наскоро некој да го стигне и неговиот рекорд, а тоа му појде од рака на неверојатниот Роберт Левандовски кој даде 13 голови на штотуку завршените квалификации. Со вториот гол во триумфот на Полска од 2-1 над Р. Ирска, гол-машината Левандовски директно ја пласираше својата земја на ЕП 2016-та во Франција.