Време е на списочето за домот од соништата да се додаде мебелот на Ирис Апфел, затоа што нема шанси нешто што ќе го купите од фабрика за мебел да биде подобро од едно парче со нејзин потпис. Го имаме и интервјуто со нејзе, во случај да имате подзаборавено за каква царица се работи и какво е нејзиното чувство за естетика.

Човек би помислил дека на крај на 2017-та година, светот, а и државава не би морале да се борат со насилството врз жените, ама еве сме, во сред борба, (замислете сè уште!) недоволно освестени. Оваа глупа човечка нарав ќе трае се додека постои и последниот сељак што мисли дека е супериорен само затоа што е маж и секоја жена што изјавува дека „шамарот не бил до толку страшен.”

Кафе од Буба.

Ниту жените се толку глупи, ниту мажите се толку кретени како на епизодава од Inside Amy Schumer. И не доаѓајте со докази дека се, затоа што толку од вербата во човештвото. Само ќе се согласиме дека, без разлика што ликовите се претерани, некаде длабоко под сето тоа, сепак лежи - точката на инспирација. 

Во прва година на колеџ, Беки Купер открива дека ѝ лежи картографија, откако ја ангажираат да помогне при мапирање на јавните уметнички дела на Менхетн. После тоа, се инспирира да оствари една своја идеја – да ги означи на мапа нејзините сеќавања. И каков неверојатен проект е тоа!

Ако само Старбакс ви е погодено кафе и уживате во комуникацијата со вработените таму, довикувањето за тоа како ви е името, недоразбирањата околу нарачката, и целата таа Старбакс магија, СНЛ има совршен производ за вас. Сега можете сè тоа - дома.

Слаба коса не значи и неквалитетна коса. Само значи дека веројатно побрзо ви се мрси и не можете да се пофалите со многу волумен. Се преживува, не е страшно. Џеј Браф, професионалец за коса ќе ве научи како.

Видеото почнува со девојката што, видно возбудена дека разговара со неа, ѝ вика дека се чувствува како „да гледа директно во сонце”. И стварно впечатокот кога ја гледаш Синди Крафорд е некако таков.

Штом ќе се стемни, Алан Корну облекува чизми, ја става опремата на рамо и се упатува кон најблиските скали што ќе му ја донесат следната фотографија од кров во Париз.

„Глумците интерпретираат. Не можете да го споредите глумењето со друга форма на уметност. Не би рекла дека самата глума е уметност, но филмот како целина е."

Од позначајните учесници во спотот на Мајкл Џексон за In The Closet, сега фалат минимум двајца. Затоа што, тоа што го носи Наоми Кембел тука (и е многу, многу згодна) е Алаја.

Во последно време сме преплавени на Фејсбук и Инстаграм со тоа појачаните веѓи до небо, хајлајтерот што бара маска за заварување и туш врз 17 слоеви сенка. Французинките ич нејќат така.

Се сеќавате кога интернетот експлодираше со „кокосово масло овде – кокосово масло онде”, па го купувавме на тони, го мачкавме кај стигнеме, трепки растевме со него и на мачките им дававме? Среќа сега се смири еуфоријата, па ни останаа само фините работи што ги научивме околу кокосот. И излегува дека нешто не ни е доучено.

Или, како од движење за еднаквост, солидарност и вистинска социјална правда да направиш квазиидеологија што, освен што прави штета на каузата и ги враќа жените наназад, покажува колку уствари врска немаш од животот.

Што правиш кога ќе понудиш на Дизни да направи парк кај тебе и нема да се погодите со условите? Ќе си направиш твој, што божем не е Дизни, ама вожњите и замоците некако сепак ќе те издаваат. Паркот Дримленд, блиску до Нара, Јапонија работел одлично додека не дојде вистинскиот Дизниленд во Токио. Тоа што беше затворен од 2006-та, не го спречува Шејн Томас - австралиски фотограф со страст за распаднати и напуштени места за кои одамна поминал возот за поправање – да запне и да влезе внатре да слика.

Малку луѓе предизвикуваат такво превртување со очи во денешно време како Лина Данам, самопрогласениот глас на една генерација и претенциозно привилегирано дете на влијателни родители. Нејзиното дело, серијата Girls, која пројде одлично заради границата меѓу реално прикажување на девојачките проблеми во Њујорк и иритантното инсистирање на Лина да го гледаме нејзиниот лик разголен во своето психичко и физичко несовршенство, кое помина не затоа што Лина имаше многу да каже на таа тема туку затоа што е - модерно.

Кога се дозна минатата недела дека Конде Наст го праќа Тин Вог во историја, општата реакција беше „Зошто сега, кога баш добро му иде на брендот?” Но за првата генерација читатели што лепеа постери и исечоци по кревети и ѕидови, неговото значење воопшто не зависи од релевантноста.

Од 20-ти декември, легендарната концептуална продавница во Париз – Колет (за што пишувавме тука) се затвора. Нивното место, во улицата Сан Оноре веќе го мерка Сан Лоран и во 2018-та може и да си го преземе, но до тогаш, ќе се вклопува во концептот на Колет, под диригентската палка на Антони Вакарело.

Храброто и долгогодишно тврдење дека црвениот кармин на Диор - 999 стои на секаков тен, инспирира екипа од Харперс Базар да го тестираат. Бираат четири жени, во четири различни нијанси, плус твист: ниедна не се фаќа за црвен кармин, барем не повеќе од 2 пати годишно.

Ако ви се освестува колку сте стари – Кејт Мос е на сцена 30 години. Очекувано, манекенката што се има појавено на повеќе насловни на Вог од сите нејзини колешки, разбира по нешто кога се работи за убавина.

Дојде ревијата на Victoria's Secret во Шангај, а со нејзе долетаа и ангелите од сите страни на светот (како се потрефи реченицава!). Се спремаат со шнајдери и вежбање пред да излезат на сцена, а патуваат онака како што ретко ни текнува на сите нас: згодно, макар и во тренерки.

Еден човек е обвинет за праќање смс порака и допирање на нечие колено. Среќа па, премиерот лансираше истрага за ова страшно тврдење.

„Едно време... самоуверено се идентификував како феминист.” Вака Ванеса де Ларги (колумнистка за Максим, новинарка и актерка) почнува својот бес да го истура во колумна за Хафингтон Пост. Она што следува е или врвен новинарски потег, или професионално самоубиство - а можеби и двете. Затоа што жените знаат да бидат многу језиви меѓу себе.

Еден од најмрачните ќошеви на интернетот не е ни апликација за бркање партнери ни фетиш-сајт, ни форум за радикални десничари, ни биткоин пазар. Money Diaries е колумна на Refinery29, каде што анонимни, млади жени го документираат секој динар што ќе го потрошат во текот на неделата, од Убери, до кафиња за носење, поклони за роденден, импулсивни нарачки, чоколатца пред добиено, или со еден збор – ситни возбудливи работи, за кои после им судат други жени што као, знаат како треба.