Четирите момчиња и четири девојчиња, вклучувајќи еден пар идентични близнаци, родени со новата постапка немаат знаци дека ги наследиле ризичните митохондријални мутации од своите мајки. Наскоро се очекува да биде родено уште едно дете чии гени биле модификувани на овој начин.
Британските власти уште во 2015 година го променија законот за да дозволат ваква процедура. Технологијата била развиена на Клиниката за плодност на Универзитетот во Њукасл.
Јадрото на речиси секоја клетка од телото содржи повеќе од 20.000 гени, но клеточната течност содржи стотици до илјадници митохондрии, кои имаат свој сет од 37 гени. Мутациите во овие гени можат да ги нарушат или целосно да ги онеспособат митохондриите со катастрофални ефекти. Децата ги наследуваат сите свои митохондрии од биолошката мајка.
Генетски нарушувања се наследуваат просечно на едно од 5.000 новороденчиња. Првите симптоми на митохондријална болест се јавуваат во раното детство, бидејќи органите гладни за енергија, како што се мозокот, срцето и мускулите, почнуваат да откажуваат. Децата што го наследиле нарушувањето имаат доцнења во развојот и проблеми со моториката. Често пати умираат млади.
Третманот со донација на митохондрии, или МДТ, има за цел да ги спречи децата да наследат мутирани митохондрии. Постапката вклучува оплодување на мајчината јајце клетка со спермата на таткото, а потоа генетскиот материјал од јадрото се пренесува во оплодена здрава донорска јајце клетка на која ѝ е отстрането јадрото. Ова создава оплодена јајце клетка со целосен сет на хромозоми од родителите, но здрави митохондрии од донаторот. Јајцето потоа се имплантира во матката за да се воспостави бременост.
Првите осум бебиња родени со постапката биле здрави при раѓање. Едно дете развило уринарна инфекција која била третирана, а друго развило мускулни грчеви кои се решиле сами од себе. Трето дете развило високи нивоа на масти во крвта и нарушување на срцевиот ритам, кое исто така било третирано.
Генетските тестови покажале дека бебињата немале или имале премногу ниски нивоа на мутирани митохондрии за да предизвикаат болест. Постапката сè уште може да се подобри.
Пет деца се на возраст под една година, две се на возраст помеѓу една и две години, а осмото е постаро. Сите се развиваат добро, изјави Боби Мекфарланд, директор на здравствената служба за ретки митохондриски нарушувања.
Како родители, сè што отсекогаш сакавме беше да му дадеме на нашето дете здрав почеток во животот. По години неизвесност, овој третман ни даде надеж - а потоа ни го даде и нашето бебе... Благодарни сме. Науката ни даде шанса, изјави една од мајките.
Жените со наследни генетски нарушувања создаваат јајце-клетки со различна концентрација на мутирани митохондрии. Со генетско тестирање може да се изберат поздрави јајце-клетки, со помал ризик од наследство. Некои жени немаат избор бидејќи сите нивни јајце-клетки имаат високо ниво на мутации.
Тимот од Њукасл објави дека изјави дека осум од 22 (36%) жени забремениле по Третман на митохондриска донација, а 16 од 39 (41%) по генетско тестирање.
