Скандирања „Турците надвор!“, „Не сакаме мигранти“ и „Турците нема да шетаат низ градот“, синоќа одекнуваа пред владата на Црна Гора од неколку илјади луѓе што протестираа на нападот од група мигранти врз момче во населбата Забјело. Била истакната парола „Се браниме од понатамошна миграција, бодења, силувања и окупација“.
Момчето, кое било седум пати прободено со нож, било син на полицаец. Тоа е во стабилна состојба. Обвинителството објави дека во врска со нападот се приведени државјани на Турција и Азербејџан.
Нападот предизвика бран насилства. Во Подгорица бил демолиран ресторан во сопственост на турски државјанин и бил запален автомобил. Во Бар биле демолирани два локали на Турци. Полицијата објави дека се приведени осум лица поради „предизвикување насилства и национална и верска омраза“.
Веднаш по нападот владата го поништи безвизниот режим за турски граѓани. Во Црна Гора со 623.000 жители, има околу 100.000 странци од кои околу 14.000 се од Турција.
Поранешниот директор на затворот „Скопје“ во Шуто Оризари, Филип Андов – Сокол, е осуден на казна затвор во траење од осум месеци за злоупотреба на службената положба и овластување.
На останатите обвинети, шест затворски полицајци, им се изречени условни казни затвор кои нема да се реализираат доколку во наредните една, односно три години, не сторат ново кривично дело.
Обвинетите на петмина осуденици им овозможиле незаконски погодности. Осудените биле спроведувани до своите домови и до други локации за приватни потреби, спротивно на пропишаната постапка.
Од СДСМ ја обвинија актеулната власта дека преку „нарачани судски пресуди“ врши директна репресија врз партиски функционери од опозицијата.
ВМРО-ДПМНЕ велат дека Андонов неодамна беше назначен за член на Извршниот одбор на опозициската партија за да може пресудата за него подоцна да се претстави како политички прогон.
Како одговор на украинскиот напад со дронови врз резиденцијата на рускиот претседател во Новгородската област, Владимир Путин наредил во 2026 година да биде проширена тампон-зоната околу украинските погранични градови Харков и Суми, изјави генералот Валериј Герасимов, началник на Генералштабот на руските сили.
Руската група „Север“ во 2024 година настојуваше да воспостави зона на безбедност во североисточна Украина, за да ја оддалечи украинската артилерија од руска територија и да спречи напади со дронови врз Белгород и Курск.
Украинските власти тврдат дека оваа зона воопшто не е превентивна, туку се користи за да се овозможат подлабоки упади на руските сили на украинска територија.
Киев упорно негира дека испратил дронови кон резиденцијата на Путин и тврди дека тоа се лажни вести што ги шири Кремљ за да ги блокира мировните преговори.
