- Истрели и рафали синоќа се слушале во две ромски населби во близина на словенечкиот град Ново Место, каде што во саботата група Роми му се заканувале на момче, а потоа го претепале и го убиле неговиот татко. По пријавите за пукања, полицијата целосно го блокирала селото Жабјак. Нема информации за повредени лица. Пукање имало и во ромската населбата Долењска во Шмихел.
- „За жал, ова е редовна практика во нашиот град. Се надевам дека полицијата ќе спречи употреба на оружје. Во последните денови неколку пати коментирав дека веќе имаме премногу оружје кое треба да се отстрани од дофат на деца и неурамнотежени луѓе“, изјави жупанот на Ново Место, Грегор Мацедони.
- Во вторникот десетина илјади луѓе пред општинската зграда протестираа против зголеменото насилство во Словенија. Маскирани демонстранти повикувале на линч на Роми и за протерување на мигрантите.
- Чувствувајќи одговорност за насилствата и убиството, оставки поднесоа министрите за внатрешни работи Боштјан Поклукар и за правосудство Андреја Катич.
- Премиерот Роберт Голоб најави нов пакет закони, кои на полицијата ќе ѝ ги зголемат овластувањата, построга политика за криминалците што повториле дела, зајакнување на социјалните служби и полесно запленување имот со непознато потекло.
- Поранешниот директор на затворот „Скопје“ во Шуто Оризари, Филип Андов – Сокол, е осуден на казна затвор во траење од осум месеци за злоупотреба на службената положба и овластување.
- На останатите обвинети, шест затворски полицајци, им се изречени условни казни затвор кои нема да се реализираат доколку во наредните една, односно три години, не сторат ново кривично дело.
- Обвинетите на петмина осуденици им овозможиле незаконски погодности. Осудените биле спроведувани до своите домови и до други локации за приватни потреби, спротивно на пропишаната постапка.
- Од СДСМ ја обвинија актеулната власта дека преку „нарачани судски пресуди“ врши директна репресија врз партиски функционери од опозицијата.
- ВМРО-ДПМНЕ велат дека Андонов неодамна беше назначен за член на Извршниот одбор на опозициската партија за да може пресудата за него подоцна да се претстави како политички прогон.
- Како одговор на украинскиот напад со дронови врз резиденцијата на рускиот претседател во Новгородската област, Владимир Путин наредил во 2026 година да биде проширена тампон-зоната околу украинските погранични градови Харков и Суми, изјави генералот Валериј Герасимов, началник на Генералштабот на руските сили.
- Руската група „Север“ во 2024 година настојуваше да воспостави зона на безбедност во североисточна Украина, за да ја оддалечи украинската артилерија од руска територија и да спречи напади со дронови врз Белгород и Курск.
- Украинските власти тврдат дека оваа зона воопшто не е превентивна, туку се користи за да се овозможат подлабоки упади на руските сили на украинска територија.
- Киев упорно негира дека испратил дронови кон резиденцијата на Путин и тврди дека тоа се лажни вести што ги шири Кремљ за да ги блокира мировните преговори.
