Вести › Набрзинка

Американски војници си одат од базите во Романија

29 октомври 2025

САД ќе го преполоват својот воен контингент во Романија во рамките на повлекување на трупите распоредени на источното крило на НАТО. Од сегашните 1.700 војници, во Романија ќе останат 900.
Американците ќе ја повлечат најголемата бригада во Европа, која е распоредена во воздухопловната база „Михаил Когалничеану“ во Романија, но и во бази во Бугарија, Словачка и Унгарија, изјави министерот за одбрана Јонат Мостеану. Тој додаде дека шефот на Пентагон, Пит Хегсет, неодамна ги повикал своите колеги од Источна Европа и им порачал дека „ќе мораат самите повеќе да се грижат за одбраната, бидејќи Америка го префрла фокусот на Индо-пацифичкиот регион“.
Вашингтон останува цврсто посветен на НАТО. Дури и со ова прилагодување, американското воено присуство во Европа останува поголемо отколку во 2022 година, изјави претставник на НАТО.
Според проценки од крајот на минатата година, САД имаат распоредено околу 100.000 војници и офицери во бази низ Европа. Претседателот Доналд Трамп повеќе пати најави дека сака да префрли војници од Европа кон пацифичкиот регион и ги повика европските членки на НАТО да преземат поголема одговорност за одбрана на континентот.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор