Рекламата на Жилет беше насочена против концептот на „токсична мажественост“ кои тие успеаа да ја идентификуваат во голем дел од однесувањето на машките, на возраст од 4 години па нагоре.
Сличен, но далеку поуспешен излет во активизам неодамна имаше Најк, со Колин Каперник. Додека далеку понеуспешен беше обидот на Пепси со Кендал Џенер да ги помири сите немири и незадоволства на светот.
Ваквите потези на милијарди долари вредните бизниси се заради тоа што „живееме во свет во кој брендовите мислат дека треба да имаат ’цел’“.
„Истражувањата постојано покажуваат дека милениумците сакаат брендови кои прават и значат нешто. Само тоа што ќе продаваш жилет со 5 острици веќе не е доволно.
Токму затоа тие требаше да направат нешто храбро. Јас го почитувам тоа што се обидоа, но комуникацијата (рекламата) што ја имаа е несмасна, самобендисана и лошо составена. Можно е да стоиш зад тоа дека #MeToo е неверојатно важно и да поддржуваш свет во кој мажите имаат повеќе почит и се пољубезни, но во исто време да не веруваш дека на Жилет му е местото да зборува за тоа,“ објаснува за Гардијан ко-основачот на маркетинг агенцијата Creature London, Ден Кулен-Шут.
Очекувањата се дека се повеќе брендови ќе се накачуваат на вакви најразлични општествени агенди, затоа што тоа е тренд и затоа што пресметале дека тоа е ризик кој на крај се исплати.
Од една страна забелешката е дека тоа што корпорациите во замена за профит ќе се преправаат дека некоја агенда им е важна, прави добар дел од публиката да се чувствува непријатно. Од друга страна, луѓето вмешани во маркетингот објаснуваат дека е неизбежно кампањите да имаат такви драматични теми и поенти „за да го привлечат вниманието во доба каде просечниот консумент е изложен на 10.000 реклами на ден“.
Според Кулен-Шут брендовите мора да ризикуваат и да се надеваат дека ќе бидат на правата страна на историјата и профитот.
„Премногу е рано да се каже колку успешно ќе биде ова за Жилет. Меѓутоа во време кога американската влада е на принуден одмор, сите зборуваат за Жилет... Само сакам така важна тема да не биде сведена на реклама за бричење,“ порачува Кулен-Шут.
