Забелешката на Фарад Манџу од Њујорк Тајмс е слична на сите досегашни, односно дека околу 90% од приходите на Гугл доаѓаат од он-лајн реклами, и дека и покрај парите што ги истураат во други технологии, тие се уште не можат да најдат соодветен алтернативен извор на приходи.
Според Фарад иако Гугл моментално е незапирлива сила, неговото место во иднината е помалку јасно. Тој објаснува дека иако приходи од реклами од 45 милијарди долари годишно изгледаат спектакуларно, тие се само дел од глобалниот пазар на рекламирање кој изнесува околу 550 милијарди долари, и најголемиот дел од овие пари не се реклами од форматот на Гугл.
"Всушност, најголемиот дел од индустријата на реклами е посветена на нешто што се нарекува бренд реклами. Ова се реклами кои ги гледаш на телевизија или во печатените магазини (за разлика од директните реклами на Гугл кои функционираат како еден вид огласи). Тие работат на твоите емоции притоа верувајќи дека, со тек на време, твоите пари ќе дојдат. Гугл е одличен во информации, ама допрва треба да ги научи емоциите," пишува Фарад.
Иако Гугл го знае сето ова и се труди да го поправи, со најразлични субвенции и соработки со брендовите, "неговиот главен проблем е што овие напори може да се реплицираат. За помалку од 5 години Фејсбук исто така изгради завидна инфраструктура за онлајн реклами, и огромен тим за продажба чија цел е да ги убеди огласувачите за предноста на Фејсбук рекламите во однос на телевизија. Во 2014-та, Фејсбук заработи 11,5 милијарди долари, или 65% повеќе од 2013-та. Истото ова може да го направат и голем број нови сервиси, вклучувајќи ги Пинтерест и Снапчат."
"Сето ова објаснува и зошто Лари Пејџ, ко-основачот на компанијата и ЦЕО, неодамна одговорноста за најголемиот број продукти на Гугл му ја префрли на свој потчинет, за тој да може да се фокусира на стратегија. Ова исто така објаснува и зошто Гугл ја зголеми потрошувачката на истражување и развој за четвртиот квартал од 2,1 милијарда на 2,8 милијарди долари," објаснува Фарад.
Есеноска, аналитичарот за технологија, Бен Томсон на својот блог пишуваше за проблемот на Гугл, каде објасни дека овие странични проекти на компанијата (Гугл Фајбер, Гугл Глас...) го потсетуваат на проектите во кои Микрософт вложи многу пари и време, а виде многу мали резултати од инвестицијата.
"За мене споредбата со Микрософт не може да биде ништо појасна. Ова е цената на успехот - тоа што го гледаш е компанија која станала доминантна, и нејзината доминантност ја спречува таа да биде доминантна во следната голема работа. Ова е речиси природен закон на бизнисот," пишува Томсон.
