Европската Унија сериозно ја разгледува можноста да возврати со „тешка артилерија“ на новите царини од Доналд Трамп за сите трговски партнери на САД.
Денот на ослободувањето, како што Трамп го најави воведувањето тарифи на 2 април, е досега најжестоката етапа во неговата трговска војна со светот, што ја почна со воведувањето царини за Канада, Мексико и Кина. Следуваа универзалните царини за увоз на челик и алуминиум, а потоа и за автомобили.
Брисел досега настојуваше да возврати со одмерени контрацарини, со кои беа опфатени американските културни икони, како бурбонот и моторите, трудејќи се да не ја ескалира пресметката, но на располагање има многу посериозни мерки, како заострување на регулативите за услуги увезени од САД.
Контрамерките може да бидат насочени кон банкарските и технолошките гиганти, како Џеј Пи Морган или Банката на Америка од Вол стрит, или Гугл, Амазон и Икс од Силициумската долина.
Европа има суфицит со САД во трговијата со автомобили, фармацевтски производи и храна, но и значително повеќе увезува американски услуги. Ако се опфатат и производите и услугите, трансатлантскиот трговски баланс всушност е речиси изедначен. Разликата е само 50 милијарди, што е 3% од вкупната трговска размена од 1.700 милијарди долари.
Американските технолошки гиганти, финансиската индустрија и фармацевтски компании имаат длабоки корени во Европа. Ако ја притиснете Европа, Брисел може да ги затегне стегите со дигитални давачки за технолошки компании, со регулаторни ограничувања за банки од Вол стрит или со царини за американски лекови. Америка можеби мавта со поголем стап, но и Европа има остри камења за да возврати, вели Тобијас Герке од Европскиот совет за надворешни односи.
Моќно европско оружје е Законот за дигитални пазари, кој е насочен против доминација на технолошки гиганти и за поттикнување компетитивност. До крајот на оваа недела Европската комисија треба да се произнесе дали американските компании Епл и Мета ги прекршуваат правилата од законот.
ЕУ може да го ограничи пристапот на американски компании за енергетика и консултантски услуги до тендери за јавни набавки.
Но „нуклеарното“ оружје е Инструментот против принуди, кој на Европската комисија ѝ дава право да воведува царини, тарифи и други мерки како реакција на дејства што ги смета за принуда. За да се воведат, потребна е согласност од 15 од 27-те членки на ЕУ.
Европски компании предупредуваат дека никој нема полза од употребата на таков инструмент и ескалирање на војната.
Нашите економии се испреплетени. Кога воведувате царина или мерка, вие исто така ги повредувате и сопствените интереси, изјави Луиза Сантос, од лоби групата Бизнис Европа.
Иако сигнализира ескалирање, Брисел повеќе би сакал преговори со Вашингтон. Еврокомесарот за трговија Марош Шевчович изрази надеж дека со американските колеги може да усогласи рамка за преговори. Европа, на пример, може да понуди инвестиции во американската индустрија за оружје, да купува повеќе природен течен гас или да ублажи регулативи
Ние не сакаме да преминеме од трговија на безбедност. Тие веројатно нема да сакаат да преминат од трговија на технологија, така? Мислам, ако веќе се тепаме, барем да имаме јасен ринг, изјави за Политико висок офицер од европска земја.
