Денот на ослободувањето, како што претседателот Доналд Трамп го претстави воведувањето реципрочни тарифи за 180 земји, ќе ги оптовари семејните буџети на Американците.
Сложената испреплетеност на светските економии значи дека нема да поскапат само странските производи, туку и оние од американски компании што своите фабрики ги префрлиле во други земји или увезуваат делови и компоненти.
Во теорија, зголемената царина од 10% паѓа на товар на увозникот, кој за да избегне штета би требало за ист процент да ја зголеми цената на производот, па разликата всушност ќе ја плаќаат потрошувачите.
Аналитичари од Rosenblatt Securities, на пример, укажуваат дека Епл, кој своите телефони ги произведува во фабрики во Кина, ќе треба да ги зголеми цените за да надомести трошоци од 39,5 милијарди долари поради царините од 54% за увоз од Кина.
Се проценува дека за 43% ќе поскапат смартфоните Ајфон и паметните часовници, таблетите Ајпад за 42%, а слушалките и компјутерите Мак ер би требало да поскапат за 39%. При такво сценарио, најевтиниот Ајфон што во февруари чинеше 599 долари, би поскапел на 856 долари, а најскапиот модел 16 Pro Max од 1.599 долари би скокнал на 2.300 долари.
Околу 34,5% од целата електроника - компјутери, телевизори и додатоци како тастатури, мемориски картички и хард дискови - и телекомуникациската опрема увезена во САД доаѓа од Кина, додека Малезија, Тајван, Виетнам, Јапонија, Германија и Јужна Кореја се исто така меѓу најголемите извозници.
Значително ќе поскапи и кафето во зрно, кое САД го увезуваат од латиноамериканските земји, 35% од Бразил и 27% од Колумбија. Трамп им наметна царини од 10% на овие земји. Уште повеќе ќе поскапи чоколадото, бидејќи се увезува какао од африкански земји, за кои се предвидени уште повисоки тарифи. Главниот извозник - Брегот на Слоновата Коска, се соочува со царини од 21%. Путерот од какао Американците го увезуваат од Индонезија и Малезија, на кои Трамп им најави тарифи од по 32%.
Повеќе од 60% од увозот на ориз во САД доаѓа од Тајланд, Индија и Пакистан, наведува Министерството за земјоделство. Тајланд и Пакистан се соочуваат со царини од 36% и 29% соодветно.
Облеката за Американците главно им ја кројат во Бангладеш, Камбоџа, Индија, Индонезија и Пакистан. Овие земји сега се погодени со високи тарифи, од 26 па до 49%.
Американската комисија за меѓународна трговија проценува дека 37% од целиот американски увоз на обувки – во вкупна вредност од околу 9,5 милијарди долари - доаѓа од Кина, која е погодена од комбинирана царина од 54%.
Од Кина доаѓаат и играчките. Компанијата „Мател“, која ги произведува популарните барбики и колички „хот вилс“, од Кина ги купува 40% од своите производи.
Поради универзалните царини од 25% Американците ќе мора да издвојат и по 2.000 до 5.000 долари за европски автомобили од пониска класа произведени во Европа. Полуксузните модели може да поскапат и за 20.000 долари. Поскапи ќе бидат и возилата произведени во фабрики во Мексико и во Канада, кои задоволуваат 22% од побарувачката на автомобили во САД.
