Трагедијата во македонскиот клуб на смртта отвори многу прашања и разоткри низа безбедносни пропусти. Преполн клуб, пиротехника, лесно запаливи материјали од кои пожарот брзо пламнал и само еден излез се рецепт за трагедија.
Во Хрватска немало толку смртоносни пожари. Веројатноста за такво сценарио е сведена на минимум поради ригорозните мерки и честите контроли, велат стручњаците. Тоа го потврдиле и 3.184 надзори на противпожарната безбедност спроведени лани.
Во пожарите во станови кај нас вообичаено чадот убива. Кога ќе побегнете во влез, повторно чадот е опасен. А во вакви ситуации, кога имате и паника, ако е вистина дека имало само еден излез, тоа е смртоносна замка, вели Синиша Јембрих, командант на Противпожарната служба на Загреб.
Тој објаснува дека службите најчесто бараат документација дека се проверени инсталациите, гасните, громобранските, електричните. Ако нема испитувања или редовно одржување, се оди со одредени мерки, а ако ни тоа не даде резултат, со прекршочен налог.
Досега кај нас немало такво нешто и ние сме прилично задоволни поради тоа, вели Невен Туркаљ, началник на Секторот за инспекција при цивилната заштита.
Особено строги се мерките за користење пиротехника. Ако некој сака огномет или сценски ефект, тоа мора да го направи со лица што добиле овластување од инспекцијата. Дозвола се бара со документација и елаборат. Во повеќе случаи биле забранети такви сценски ефекти во затворени простори и сали во кои се собираат голем број луѓе.
Нема настан, фудбалски натпревар, светско првенство, на кој не се користат некои „фонтани“. И кај нас се прави тоа се повеќе, но тоа мора да го управуваат оспособени професионалци. Такво нешто не може да дојде до раце на аматери што експериментираат, вели за хрватскиот Т-портал пиротехничарот Фрањо Колетиќ.
Наспроти опасностите, има такви што ги игнорираат правилата.
Луѓе ќе нарачаат „фонтана“ преку интернет, па ќе испадне дека е превисока. Педесет пати нема да се случи ништо, но еднаш ќе го зафати таванот, предупредува Колетиќ.
