Генерално овој индекс расте далеку побрзо отколку растот на цените на потрошувачките производи на двете страни на Атлантикот.
Па така, во последните 11 години цената на Бурбери мантил е зголемена за 5,6 пати од 122 на 1,190 евра, цената на чифт Лобутин чевли е скокната од 249 на 425 евра, а најекстремно е поскапувањето на Ролекс Јахтмастер од платина кој од 5.488 евра, скокна на 39.000 евра.
Во малку "поразумните" поскапувања влегуваат Хермес марами кои сега чинат 310 евра од почетните 229, Реј-Бан Wayfarers кои во 2000-та се продаваа за 90 евра, денес се 145 и парфемот Chanel No.5 кој од 67 евра, порасна на 106 (за 7 милилитри).
Едни од главните виновници за растот на цените се муштериите од Кина и Азија, чија побарувачка им дозволува на производителите континуирано да ги зголемуваат цените.
Освен ова аналитичарите објаснуваат дека во индустријата за луксузни производи, зголемувањето на цените е еден од најдобрите начини за "диференцирање на производот," и дека на тој начин го засилуваат "фетиш" аспектот на брендот.
Инаку, индексот на Форбс во предвид ја зема цената на 40 клучни производи и услуги, кои го сочинуваат животот на еден богаташ. Меѓу другите, на листата се: чевли John Lobb, Хермес чанти, килограм Севруга кавијар од Петросиан, шише Дом Перињон од 2002-ра, сесија со терапевт од Петата Авенија, фејслифтинг од познат пластичен хирург, влезници за двајца за Метрополитен Операта во Њујорк, Сикорски хеликоптер или Ролс-Ројс Фантом.
