Промената ќе се случи кон крајот на летово а освен замена на сината боја со црна, малку ќе ја ц'цнеле и пораката која со бели букви ќе гласи:
“Your device ran into a problem and needs to restart.”
Така подобро ќе се читало и промената била во склад со дизајнерските принципи на Виндоус 11.
Повеќе од 3 децении доминираше таа сина боја на екранот (RGB: 0, 120, 215 или #0078D7) во случај на неволја. Првата порака, пуштена во раните 90-ти, ја има срочено поранешниот извршен директор, Стив Балмер и гласела:
“This Windows application has stopped responding to the system.”
Наивни веруваа дека мавање по Escape и Enter ќе помогне, но единственото чаре главно беше “CTRL+ALT+DEL”, за да се почне одново.
‘Blue Screen of Death’ стана широко позната поп-културна референца со која обожаваа да се зезаат конкурентите од Епл. Но, сината боја збоктиса и дојде време луѓе да ја заборават за време на минатогодишниот глобален ИТ прекин, предизвикан од дефектна надградба на безбедносниот софтвер на компанијата CrowdStrike. Најголемиот IT куршлус во историјата одеднаш посини милиони уреди со Микрософт Виндоус, 5.000 летови беа откажани, болници откажуваа прегледи и процедури, банкарскиот систем пријави загуби во милијарди долари.
Во иднина ќе биде исто, само црно. А ќе се најдат сега и онакви кои ќе бидат носталгични по таа плава боја па ќе им досаѓаат на младите: Во мое време...
