Според извештајот од Ситизен Лаб, канадски истражувачки центар, во последните два месеца, софтверот има најголем број на нови инсталации во Европа, меѓу кои и една во Македонија.
Останатите нови "корисници" се: Австрија, Унгарија, Романија, Бугарија, Турција, Литванија, Пакистан, Нигерија, Јужна Африка и Панама.
Претходно го имаа инсталирано: САД, Канада, Мексико, Обединетото Кралство, Холандија, Германија, Естонија, Летонија, Естонија, Туркменистан, Бахреин, Катар, Брунеи, Емиратите, Монголија, Индија, Бангладеш, Виетнам, Јапонија, Малезија, Индонезија, Сингапур, и Австралија.
Софтверот изработен од ФинФишер (во сопственост на Гама Интернационал) се продава исклучително на влади. Тој ги заразува компјутерите и мобилните телефони, преку што неговиот оператор добива пристап до уредот. Меѓу методите што ги користи за влегување во вашиот систем е претставување на софтверот како Мозила Фајфокс (Мозила и официјално побара ова да престане), или криење на сомнителни .exe фајлови во слика со .jpg екстензија.
Откако фајлот ќе биде инсталиран на машината, тој се поврзува на "серверот за управување и контрола" преку кој се мониторира вашиот компјутер.
Софтверот, барем верзијата што му беше продадена на Мубарак, чини 560.000 долари. Иако целиот бизнис е дискретен, тој е сосема легален во голем број држави.
