- Фудбалскиот натпревар од Купот „Мамаду Думбуја“ во Гвинеја помеѓу екипите на Н’Зерекоре и Лабе донесе катастрофални вести.
- На финалето од турнирот во чест на воениот лидер Мамади Думбуја, еден спорен пенал за домаќините придонел за ескалација на случувањата.
- Лабе добил два црвени картона, од кои еден бил поништен од страна на министер во Владата.
- Гостинските навивачи незадоволни од одлуката почнале да фрлаат камења и се симнале на теренот. Полицијата фрлила солзавец за да ја смири ситуацијата, а потоа настанал хаос и стампедо во кое загинале на 100 души.
- Поранешниот голман на Слобода Ужице, белградски Партизан и други српски и грчки клубови Радиша Илиќ (47) извршил самоубиство откако скокнал од тераса во својот дом. Тој подолго време тешко боледувал, пренесуваат српските медиуми.
- Навивачите на Партизан ќе го паметат како јунак кој ги внесе во Лига на шампиони во август 2010-та година кога директно и индиректно влијаеше на три промашени пенали на белгиски Андерлехт во Брисел во баражот за пласман во Лига на шампиони.
- Со белградските црно-бели Илиќ освои дури пет шампионски титули и два национални Купа а забележа и еден настап за Србија, на пријателска средба со Македонија во 2008-ма.
- Македонската ракометна репрезентација одигра два различни дела од дуелот со Словенија во квалификациите за Европско првенство 2026. На крајот Словенците победија убедливо со шест гола разлика.
- Селекторот Кире Лазаров после мечот повторно зборуваше за овдешниот менталитет. Кажа дека не е разочаран од поразот но дека му смета што „Македонец по забележителен успех е тешко да го држиш свесен и трезвен и дека ова е добра лекција за нашиот менталитет“. „Ние само се повторуваме, не знаеме како Македонци да бидеме константни во повремените успеси. Треба да се работи на менталниот склоп“.
- Македонија е трета во групата зад Словенија и Литванија а до крајот од квалификациите ја очекуваат дуели со Словенија, Литванија и Естонија. Одлуката за пласманот на Европското првенство ќе падне во мај кога Македонија ѝ гостува на Естонија и ја дочекува Литванија во клучен меч.
