Судиите најчесто не се омилени во ниту еден спорт. Публиката понекогаш заборава дека и тие имаат право на грешка, но тоа што направил еден фудбалски судија во Шпанија отишло и надвор од рамките на фудбалот.
За време на мечот меѓу женските тимови Спортинг Уелва - Санта Тереза во Првата шпанска лига, судијата Сантијаго Кихада Алкон повикал една фудбалерка на Спортинг на состанок. Романката Елена Јулијана Павел изјави за шпанските медиуми:
„Ми се обрати вака: Еј смеѓа, да те носам на кафе после натпреваров. Му одговорив да продолжи да дува во таа негова свирка“, изјавила 31-годишната фудбалерка.
Подоцна Романката додала дека не чувствувала ништо друго освен срам и понижување и дека веќе никогаш нема да верува во фер плеј. Нејзиниот тим загубил 2:3, а таа подоцна го обвинила Алкон дека бил пристрасен и дека судел на штета на нејзиниот тим.
Судијата за време на мечот исклучил две фудбалерки на Спортинг, не досудил пенал и прерано досудил крај на мечот. Во меѓувреме од шпанската фудбалска федерација соопштија дека го следат случајот и дека ќе отворат истрага за да дојдат до заклучок дали имало неправилности во однесувањето на судијата швалер.
