Македонската фудбалска селекција оствари две победи за кои селекторот Благоја Милевски би рекол дека не треба „да им се гледа во заби“, иако и тој самиот а и играчите се свесни дека се далеку од посакуваната форма.
Селекторот Милевски за разлика од дуелот со Малта, вечерва направи шест измени. Од почеток ги немаше Димитриевски, Муслиу, Елмас, Трајковски, Зајков и Миовски. Некои беа отсутни поради повреда а некои беа резерви на клупата.
Во првиот дел македонските фудбалери имаа иницијатива но топката одново не одеше течно, исто како и на средбата со Малта поврзаноста меѓу редовите не беше сјајна.
Mилевски се обиде со Милан Ристовски и Илија Несторовски во тандем но очигледно е дека двајцата не функционираат добро во шпицот па нивната бледа партија придонесе за нула на полувремето. Единствена сериозна шанса за споменување е онаа на Езџан Алиоски кога топката заврши во пречката.
Во вториот дел Милевски направи пет измени, а нововлезените Елмас и Миовски ја освежија играта во нападот, па шпицот на шкотски Абердин на девет минути пред крајот од мечот ја спаси Македонија од очаен резултат и бламажа со далеку од реномираниот противник кој секаде служи за поправање на гол-разликата.
Вечерва македонската репрезентација доби уште еден дебитант откако својот прв меч во црвениот дрес го имаше и Јован Манев, дефанивецот на турска Адана кој влезе во игра на местото на Дарко Велковски.
Македонија во месец јуни ја очекува домашен меч со Украина на 16-ти јуни и гостински мегдан со силната Англија на 19-ти јуни на култниот и легендарен „Олд Трафорд“ во Манчестер.