Вести › Набрзинка

Пентагон бара 200 милијарди долари за војната со Иран

19 март 2026

Министерството за одбрана на САД побарало од Белата куќа 200 милијарди долари за финансирање на војната со Иран. Тешко дека ќе ги добие, бидејќи процедурата мора да помине низ Конгресот, во кој демократите и дел од републиканците се против продолжување на војната.
Оваа сума треба да ги покрие директните трошоци од ангажманот на војниците, оружјето, горивото и опремата во војната, како и зголемување на производството за надополнување на резервите од критичната муниција.
Од 28 февруари, кога заедно со Израел ја почнаа операцијата Епски гнев, американските сили погодиле над 7.000 цели во Иран. Досега истрелале 318 крстосувачки проектили „томахавк“, кои чинат по 3,5 милиони долари. Од воените бази и бродовите во регионот лансирале и над 800 пресретнувачки ракети од батериите „Патриот“ и другите противвоздушни системи.
Според извештај од Центарот за стратегиски и меѓународни студии, само во првите шест дена од војната биле потрошени 12,7 милијарди долари, од кои 5,5 милијарди долари на офанзивна муниција и 5,7 милијарди на дефанзивна. На ова се надоврзува и претрпената штета на оружјето, опремата и инфраструктурата од 1,4 милијарди долари и оперативните трошоци од 27 милиони.
Вкупните трошоци до 13 март биле 16,5 милијарди долари, а до денес се проценуваат на околу 18 милијарди долари, речиси по 900 милиони на ден.

извор

Трет смртен случај од западнонилска треска, шестмина се во критична состојба

17 август 2026

Викендот починал пациент со западнонилска треска, со што вкупната бројка на смртни случаи во земјава се искачи на 3. Станува збор за 61-годишен пациент кој имал придружни сериозни заболувања и е од едно од погодените места.
Лабораториски се потврдени 35 случаи со вирусот, а уште тројца суспектни се во процес на дијагностицирање.
Овие шестмина кои се во критична состојба и се лекуваат во Одделот за интензивна нега се на возраст над 60, најмладиот пациент кој е хоспитализиран е 25-годишен, но е во стабилна здравствена состојба.
„Инкубацијата на вирусот е 3 до 14 дена. Сите пациенти се со епидемиолошка анкета и се лоцира дали патувале во странство, дали патувале надвор од местото на живеење внатре во земјата, и каде се движеле. Има луѓе со урбани адреси, но имале и викендичка, и најверојатно во тој период престојувале на овие места, така што во основа сите мерки се насочуваат таму каде што е најверојатното место на заразување. Една од мерките е лична заштита од убоди од комарци, и отстранување на застоена вода во дворови или непосредна околина. Општините каде што е прогласена епидемија сите ќе добијат и СМС пораки со насоки за постапување изработени од Институтот за јавно здравје кои веќе се комуницираат“, кажал министерот Клековски.
За луѓето не постои вакцина, за коњите има (Википедија).