Во времето кога полковникот Том Паркер прв пат го видел Елвис Присли на сцена, водел патувачка панаѓурска трупа, замислувајќи се како модерен П.Т. Барнум. Негов главен музички адут бил кантри пејачот Хенк Сноу, кого набргу по средбата со Присли го откачува гледајќи огромен потенцијал во „белото момче кое звучи како црно“ и во неговото еротично мрдање со куковите поради кое е наречен „Елвис д Пелвис“ (Елвис Карлицата).
Ова е почетокот на новиот, истоимен филм за Елвис на Баз Лурман, кој визуелно е малку напорен, вклучувајќи го и прекумерниот римел на главниот лик. Но тука сепак има и интересни детали, меѓу кои еден е лесно да се промаши особено доколку филмот го гледате без англиски титл. Кога Том Хенкс, кој го игра Паркер, зборува со своите колеги од циркусот, тој користи посебен сленг, а на екранот пишува „talking in ciazarn".
Kизарни, или карни, е тип на говор кој бил карактеристичен за панаѓурските и циркуските работници особено во САД. Ваквите професионални сленгови се чести, а нивната цел е да ги исклучат аутсајдерите од интерната комуникација и да обезбедат поголемо заедништво во рамките на фелата. Така, познати се специјализирани, тајни говори на морнари, џез музичари, кај нас на кратовските ѕидари и на нашите чалгаџии. „Карни“ затоа што тоа е и неформално име на патувачки карневалски работник. „Киазарни“ затоа што ја илустрира логиката на говорот, кој кога претвора нормален збор во киазарни користи дополнителни самогласки, најчесто и, а и з, кои се додаваат на средина од зборот. Така „карни“ станува „ки-а-зар-ни“.
Правилата на сленгот се едноставни, но кога тој се зборува брзо овозможува карневалџиите да си зборуваат меѓу себе без страв дека ќе бидат разбрани од останатите, особено од посетителите. И не е само до начинот на изговарање, туку постои и богат дополнителен речник на различни термини карактеристични за професијата. Некои од современите хип-хоп сленгови користат слични правила. Снуп Дог и Џеј Зи популаризираа вметнување на „изл“ во средината на зборовите, па така for sure стануваше fo shizzle. Ова е многу блиску до карневалската верзија на изразот.
Карневалскиот сленг произлегол од неопходност - со оглед на постојаните патувања, работниците биле сметани за туѓиници каде и да се појавеле, па единствените блиски им биле нивните колеги. Истовремено, голем дел од нив биле поранешни криминалци, сирачиња, луѓе со некаков хендикеп, кои во оваа заедница наоѓале засолниште и начин да преживеат. Оттаму, меѓусебната солидарност и важноста на идентитетот на карневалџијата, отсликани во говорот.
