Френсис Крик, славниот биолог и нобеловец, бил исклучително интелигентен, но и контроверзен: имал бурен личен живот, бројни љубовни врски и интерес за психоделични дроги. Ова го тврди нова биографија (излезена на 6 ноември), под наслов „Крик: ум во движење - од ДНК до мозокот“ на Метју Коб.
Сепак, неговата научна работа била извонредна. Роден во 1916 година, тој првично студирал физика, а за време на Втората светска војна работел во британската Врховна команда на воената морнарица на истражувања поврзани со водни мини. По војната целосно се посветил на биологијата.
Во 1951 година Крик се запознал со тогаш младиот американски биолог Џејмс Вотсон и двајцата веднаш воспоставиле плодна научна соработка. Истовремено, во Лондон на Кингс колеџ работела и Розалинд Френклин, чиј кристалографски труд - особено познатата „Фотографија 51“ - бил клучен за разбирањето на структурата на ДНК. Иако долго се прераскажува дека нејзините резултати биле „украдени“ од страна на Вотсон и Крик, Коб нагласува дека таа знаела дека тие имаат пристап до нејзините податоци и дека подоцна со нив воспоставила пријателски однос. Френклин починала во 1958 година, пред доделувањето на Нобеловата награда на Вотсон, Крик и Морис Вилкинс.
Крик имал сложен брак со својата втора сопруга Одил, која била уметница и автор на славната илустрација на двојната спирала објавена во списанието „Нејчр“ во 1953 година. Нивниот животен стил бил неконвенционален и исполнет со „боемски навики“.
По славното откритие, продолжил да работи и на други фундаментални биолошки проблеми. Подоцна, во 1970-тите, се свртел кон истражувањето на свеста и невронауката, придонесувајќи со идеи што и денес се влијателни.
Крик бил познат по својот антирелигиозен став и по тоа што отворено ја критикувал црквата, британската монархија и конзервативните политички норми на времето. Во исто време, се интересирал за културата на 1960-тите, експериментирал со ЛСД и поддржувал либерални ставови за употребата на дроги. Во 1967 ја потпишал петицијата на краткотрајна организација под името Друштво за ментална свест, која е објавена како оглас во Тајмс (го платил Пол Мекартни) под наслов „Законот против марихуана е неморален и неизводлив во пракса“.
Починал во 2004 година од рак на дебелото црево. Денес, неговото име го носи големиот биомедицински истражувачки центар во Лондон - Институтот Френсис Крик, што сведочи за неговото трајно влијание врз науката.
