За клубoт „Континентал“ се слушна уште во 2011, кога пред неговите порти се одржаа протести против наводната „расистичка“ политика. Според непишан кодекс на облекување на врата во него не се пуштаат луѓе со спуштени фармерки, незаврзани патики, дебели синџири околу врат или бејзбол капчиња ставени на страна, што е толкувано како дискримација на не-белите гости. „Тоа што малцинствата се облекуваат така е случајно“, изјави тогаш сопственикот, додавајќи дека „нема ниту една расистичка коска во телото“.
Најнова вест од клубот е забраната на зборот „буквално“, кој не смее да се изговори внатре барот. Доколку тој сепак ви се испушти, како што вели знакот, имате пет минути да си ја испиете пијачката и да напуштите. А ако започнете реченица со „Јас буквално..“ е тогаш мора да си одите веднаш.
East Village bar the Continental expounds on their (tongue-in-cheek) ban on the word literally. Their stated goal now is to stop “Kardashianism.” cc: @edenbrower pic.twitter.com/iI0N41qCgt
— evgrieve (@evgrieve) January 24, 2018
Фигуративната употреба на „буквално“ е толку раширена што тој (и на англиски, но и на македонски) станува бесмислен збор, кој се вметнува и каде што треба и каде што не треба. Како што пишувавме и претходно тука, изнервиран од неговата честа злоупотреба, програмерот Мајк Вокер направи екстензија за Гугл Хром која го заменува зборот со „фигуративно“ во сите статии и на сите сајтови на англиски (со што се добива наслов од типот „10 работи за кои фигуративно немате време“). На ваквите иницијативи сега се придружува и „Континентал“. И иако барот употребата на „буквално“ ја припишува на Ким Кардашијан и зборот го нарекува „кардашијанизам“, факт е дека тој е прекумерно употребуван и пред неа, и од голем број други познати и непознати личности.
Предлог за забрана во наши услови - секој оној кој ќе каже „на крајот од денот“ (директен превод од at the end of the day, во смисла на „на крајот на краиштата“) да мора буквално да остане цел ден во кафана.
