Новинарот Џејмс Нестор се заинтересирал за респираторниот систем пред неколку години, откако неговиот доктор му предложил часови по дишење за да ги спречи честите повторувања на пневмонија и бронхит.
Додека ја истражувал науката и културата на дишењето за својата нова книга, „Здив: нова наука за загубената уметност“, Нестор учествувал во студија во која неговиот нос бил целосно затворен во тек на 10 дена, со што бил приморан да дише само низ устата. Ова не било пријатно искуство Почнал почесто да р’чи, развил спијачка апнеа, а нервниот систем му бил крајно напнат.
Истражувачите со кои зборувал препорачувале свесно следење на сопственото дишење, за да се научи начинот на кој телото сака да му се внесува воздух. Во случајот со Нестор решението било во бавните и површни земање воздух низ носот, кое му помагало да го намали стресот и да го снижи крвниот притисок. Истовремено, ако се дише ангажирајќи ја дијафрагмата, се намалува и товарот врз срцето.
Ова можеби на многумина им е познато од техниките на дишење кои се применуваат во јога. Она што е помалку познато е дека носот е поповрзан со нашите гениталии отколку кој и да е друг орган. Има луѓе кои кога се стимулирани „доле“ почнуваат неконтролирано да киваат. Оваа состојба е доволно честа што добила и име - honeymoon rhinitis, или „љубовно кивање“.
Дишењето е директно поврзано и со анксиозноста - луѓето кога се вознемирени или на кои им е страв вообичаено забрзано дишат, со тоа поттикнувајќи ја симпатетичката страна на нервниот систем. Начинот на кој ова може да се смени е да се дише длабоко. Точно тоа што обично им се сугерира на трауматизираните од сообраќајка или од некоја друга катастрофа на филмови - забавеното и длабоко дишење асоцира на релаксираност, дијафрагмата се спушта овозможувајќи повеќе воздух во белите дробови и телото веднаш се префрла на состојба на опуштеност.
Неколку години пред пишувањето на книгата, Нестор известувал од натпревар за гњурење без опрема. Таму сфатил дека не е точна теоријата дека се раѓаме со одреден капацитет на бели дробови, кој е неменлив. Некои од натпреварувачите имале капацитет на дробови од 14 литри, што е двојно од типичен возрасен маж. Тие не се родиле така, туку напорно тренирале да дишат на начини кои длабоко ќе влијаат врз нивните физички тела.
Советот на авторот е секојдневно да му олеснуваме на телото да зема воздух, со продолжување на вдишувањето и издишувањето и мрдање на дијафрагмата. Ова, особено во ситуација на секојдневен стрес, може да влијае и врз менталното здравје.
