Религиозниот туризам е третиот по големина извор на приходи за Саудијците по нафтата и петрохемиската индустрија. Како што паѓаат приходите од првите две ставки, саудиската влада сака дупката да ја пополни со пари од туризмот.
Центарот на овој туризам е Мека, односно Ќаба, градбата во облик на коцка сместена во Големата џамија. Ќаба се смета за најсветото место во исламот. За време на аџилакот во Мека пристигнуваат околу 2 милиони луѓе.
Како дел од апгрејдувањето на Мека, во тек се градежни активности кои треба да ги прошират туристичките капацитети на градот на околу 7 милиони туристи во секое време. Во проектот е вклучен и хотел од 3,5 милијарди долари, со капацитет од 10.000 соби и 70 ресторани.
Минатата година се почна со проширување на Големата џамија, вредно 10 милијарди долари.
Во реновирањето на градот ќе бидат срушени и повторно изградени 13 од 15-те постојни стари населби во Мека, а од бројните стари храмови во градот ќе остане само Ќаба.
