Рованиеми е град во Финска, 850 километри северно од главниот град Хелсинки. Арктички круг. Зимно време црна темница, летно време сонцето никоаш не заоѓа.
Пред пет години во него дошол да живее сега 28 годишниот Ша Џалал Масуд, за да студира IT. Верник е но признава дека е малку уморен од постење во фински услови. Во денот постојат само пар часови кога сонцето малку цапнува во хоризонтот и само тогаш Масуд си дозволува да се најаде и напие, иако не е сигурен дека и така не ги крши верските правила. Секој ден пости по 21 час.
Исти се дилемите на сите муслимани кои живеат во овие делови на Финска. А ги има и претежно доаѓаат од Сомалија, Ирак и Авганистан.
И теолозите не даваат прецизно решение за овој проблем. Според египетските, доколку денот е подолг од 18 часа, верникот може да се држи до времето во Мека или до зоната на најблиската муслиманска земја.
Но, според саудиската школа, без разлика на должината на денот, верникот мора да се придржува до локалното време.
Втор проблем на овие луѓе е што најблиската продавница која нуди храна приготвена според муслиманските халал правила е оддалечена 300 километри од нив.
Во последниве 10-тина година, во Финска годишно бараат прибежиште околу 750 муслимани. Владата главно ги населува на крајниот север на земјата.
