Новите 25 снимки што ќе се чуваат засекогаш

Конгресната библиотека одбра нови 25 парчиња аудио кои ќе ги додаде во својот индекс за да ги сочува за вечност (или најдолго што може). Меѓу нив многу џез ама и Пинк Флојд и Рамонс и Сајмон и Гарфанкел.

Чаби Чекер влегува во регистарот со "The Twist", Сајмон и Гарфанкел со "Sounds of Silence", Пинк Флојд со "Dark Side of the Moon", а Рамонс со "Rammones".

Иако мнозинството е музика, сепак официјалното име е Регистар на аудио записи, бидејќи меѓу зачуваните дела има и говори или радио преноси.

Во годинешното купче го има и радио преносот од Денот Д, од 5-ти и 6-ти јуни 1944-та, како и божиќната порака што Ајзенхауер ја испрати преку SCORE, првиот комуникациски сателит на светот.

За еден запис да влезе во регистарот тој треба да биде стар најмалку 10 години и да биде "културолошки, историски или естетски важен." Делата кои годинава беа додадени во библиотеката се од 1918-та до 1980-та.

Со годинешните 25, вкупниот број на аудио записи во Регистарот изнесува 375.