Со воведувањето реципрочни тарифи за целиот свет, Доналд Трамп ѝ стави крај на ерата на слободна трговија. Тарифите од САД и најавените реакции од светот ја интензивираат трговската војна што води кон глобална рецесија, предвидуваат економисти од Вол стрит.
Тарифите од Трамп се еден од најголемите економски земјотреси во поновата историја. По Втората светска војна имало само два удари што предизвикале глобална рецесија - финансиската криза во 2008 и 2009 година и пандемијата на ковид-19 во 2020 година.
Ако оваа политика се одржи, мошне веројатно ќе ги турне и САД и глобалната економија во рецесија оваа година, забележаа аналитичари од банката ЏП Морган.
САД во 2024 година увезле производи во вредност од 2.100 милијарди долари и услуги од 1.100 милијарди. Ако се спроведат целосно новите тарифи со просечна стапка од 29%, увозниците во САД ќе мора да плаќаат по околу 1.000 милијарди долари годишно, што индиректно би го оптоварило секое домаќинство со по 7.300 долари.
Тоа е малку веројатно да се случи, бидејќи некои стоки повеќе нема да се увезуваат како неконкурентни. Тоа исто така ќе значи дека се намалува трговската размена и се зголемуваат цените.
Глобализацијата во изминатите 75 години изгради сложен систем на испреплетени економии. Ако тарифите воведени од Трамп предизвикаат рецесија во некој трговски партнер на САД, тоа би се одразило со намален увоз на американски производи.
На тоа ќе се надоврзе и штетата од возвраќањата на царините, како што веќе најавија Европската Унија и Кина, првиот и четвртиот најголем трговски партнер на САД.
Како реакција на тарифите на Трамп, акциите на светските берзи изгубија од вредноста, но падот не е екстремен. Тоа се толкува како уверување на Вол стрит дека царините нема целосно да бидат спроведени, туку може да бидат „испеглани“ во билатерални договори.
Една лекција од првите неколку месеци на вториот мандат на Трамп е дека треба да дозволите вестите да стивнат, пред да ги сфатите сериозно, вели инвеститорот Метју Хуган.
