Новиот мировен план договорен на разговорите на украинските претставници со американските преговарачи Стив Виткоф и Џаред Кушнер содржи 20 точки, осум помалку од оригиналниот предложен од САД во октомври. Исфрлени се прашањата за пристапување на Украина во НАТО, откако од тоа јавно се откажаа и Киев и сојузниците.
Претседателот Володимир Зеленски рече дека повеќето ставови се значително приближени, но отворени остануваат најважните - за територијалното разграничување и за иднината на нуклеарната централа Запорожје, која сега е под контрола на Русите.
Кремљ денеска потврди дека рускиот претставник Кирил Дмитриев го брифирал претседателот Владимир Путин за напредокот на преговорите во Мајами со американските мировници Виткоф и Кушнер.
Еве го новиот мировен план со кој САД и Украина одат на преговори со Русија:
1. Суверенитетот на Украина ќе биде потврден;
2. Целосен и неоспорен договор за ненапаѓање меѓу Русија и Украина. За одржување на долгорочен мир, ќе се воспостави механизам за следење за надгледување на линијата на контакт преку вселенско беспилотно набљудување, со рано известување за прекршувања и за решавање на конфликти;
3. Украина ќе добие цврсти безбедносни гаранции;
4. Украина ќе ги задржи своите оружени сили на сегашната бројка од 800.000 војници;
5. САД, НАТО и европските земји ќе ѝ обезбедат на Украина безбедносни гаранции слични на клаузулата за заемна одбрана од Членот 5 од Основачката повелба на НАТО;
6. Русија официјално ќе се обврзе на ненапаѓање на Европа и Украина во сите потребни закони и документи, со ратификација со мнозинство гласови во Државната Дума;
7. Украина ќе стане членка на ЕУ на точно дефиниран датум и ќе добие краткорочен преференцијален пристап до европскиот пазар;
8. Украина ќе добие силен пакет за глобален развој, дефиниран во посебен договор за инвестиции;
9. Ќе бидат основани неколку фондови за економско закрепнување, реконструкција на оштетените области и хуманитарни прашања. Целта е да се соберат 800 милијарди долари за да ѝ се помогне на Украина да го реализира својот потенцијал;
10. Украина ќе го забрза процесот на склучување договор за слободна трговија со САД;
11. Украина ќе потврди дека ќе остане ненуклеарна држава, согласно Договорот за неширење на нуклеарно оружје;
12. Запорожје* Зеленски бара нуклеарната централа да ја управува заедничко американско-украински претпријатие. Украина ќе добива половина од произведената енергија, а САД независно ќе ја распределуваат другата половина;
13. Украина и Русија се обврзуваат на програми во училиштата и низ целото општество кои промовираат разбирање и толеранција кон различни култури и за елиминирање на расизмот и предрасудите. Украина ќе ги спроведе правилата на ЕУ за верска толеранција и заштита на малцинските јазици;
14. Територија* Оваа точка Зеленски ја смета за најсложена, но отворен е за преговори. Киев сака разграничувањето да ја следи сегашната линија на фронтот, а Русија бара да го добие цел Донбас, по дипломатски пат или со војна. Вашингтон предложи регионот од Донбас што сега е под украинска контрола да биде демилитаризирана слободна економска зона;
15. Русија и Украина се обврзуваат дека нема на сила да го менуваат договорот за териториите;
16. Русија нема да ја попречува Украина да ги користи реката Днепар и Црното Море за комерцијални цели. Посебни договори ќе ја опфаќаат слободата на навигација и транспорт. Устието на Днепар во Црно Море ќе биде демилитаризирано;
17. Ќе се формира хуманитарен комитет за решавање на отворените прашања за воени заробеници, заложници и притворени лица;
18. Украина мора да одржи избори што е можно поскоро по потпишувањето на договорот;
19. Овој договор ќе биде правно обврзувачки. Неговото спроведување ќе го следи и гарантира Мировен совет, со кој ќе претседава претседателот Трамп. Украина, Европа, НАТО, Русија и САД ќе бидат дел од овој механизам. Во случај на прекршувања ќе има санкции;
20. Откако сите страни ќе се согласат со овој договор, веднаш ќе стапи на сила целосен прекин на огнот.
