Објавена честитката до Епстин со провокативниот потпис на Трамп

Демократските конгресмени ја објавија „сексуално провокативната“ роденденска честитка од Доналд Трамп за педофилот Џефри Епстин, за која претседателот упорно тврди дека не постои. Останува на зборот. Вели дека потписот на чувствителното место на честитката е фалсификуван, не црта по честитки, особено не женски торза, а и содржината не одговара на неговиот речник. 

Трамп му ја испратил честитката на Епстин за неговиот 50-ти роденден во 2003 година. Комитетот на Претставничкиот дом го објави целиот роденденски албум, кој во секцијата „пријатели“ содржи и честитки од други истакнати политичари и влијателни фигури, како поранешниот претседател Бил Клинтон или тогашниот обвинител Алан Дершовиц. Многу пораки се со сексуално провокативна содржина.

Уште кога Волстрит џурнал објави дека постои писмо од Трамп до Епстин со цртеж што треба да претставува гола жена, претседателот Трамп изјави дека извештајот е „лажен, злонамерен и клеветнички“ и поднесе тужба со барање на отштета од 10 милијарди долари од весникот. 

Ова не се мои зборови, ниту начинот на кој зборувам. Исто така, не цртам слики, рече Трамп.

Писмото објавено од комисијата изгледа точно како што е опишано од Волстрит џурнал во својот извештај. „Пријателот е прекрасна работа.

Среќен роденден - и нека секој ден биде уште една прекрасна тајна“, пишува меѓу контури на жена, со потписот на Трамп на „интимната“ позиција.

Многу е јасно дека претседателот Трамп не ја нацртал оваа слика и не ја потпишал. Правниот тим на претседателот Трамп ќе продолжи агресивно да води судски постапки“, изјави портпаролката на Белата куќа, Каролин Ливит, во соопштение објавено на X.

Тоа не е негов потпис, додаде заменик-шефот на кабинетот на Белата куќа, Тејлор Будович, илустрирајќи го своето тврдење со потписи на Трамп низ годините.

Конгресменот Томас Маси, кој го предводи двопартискиот притисок за гласање во Претставничкиот дом за да се принуди Министерството за правда да ги објави досиејата за Епстин, оцени дека писмото не е релевантно за случајот.

Тоа не докажува ништо. Честитка за роденден од Трамп не им помага на преживеаните и на жртвите, рече Маси.

Претседателот со месеци се соочува со зголемен притисок да ѝ бидат претставени на јавноста доверливите документи за педофилската мрежа на Епстин и неговата поранешна девојка Гислен Максвел. Епстин беше обвинет дека им плаќал на малолетни девојчиња стотици долари во готово за масажи, а потоа ги злоставувал, а Максвел беше осудена за намамување тинејџерки да бидат сексуално злоставувани. Епстин се самоуби во затвор во мистериозни околности, а Максвел ја издржува казната и се согласи да соработува со властите во новите напори за разјаснување на случајот. 

Министерството за правда во август почна да ги предава записите од истрагата за сексуална трговија со луѓе на Епстин до Комитетот за надзор на Претставничкиот дом. Покрај книгата за родендени, конгресмените го побараа и тестаментот на Епстин, договори што ги потпишал со обвинителите, тефтерот со контактите и неговите финансиски трансакции и средства.

Друго писмо од книгата со честитки содржи шега дека Епстин му продал жена на Трамп за 22.500 долари. Авторот е Џоел Панчов, бизнисмен и член на ексклузивниот голф-клуб на Трамп во Мар-а-Лаго.

Во својата честитка поранешниот претседател Бил Клинтон ги пофалил „детската љубопитност“ и „нагонот за правење разлика“ на славеникот.

Лордот Питер Менделсон, актуелен британски амбасадор во САД, го нарекол Епстин „мојот најдобар пријател“, и во честитката приложил заеднички фотографии на кои се уште две жени.

9 септември 2025 - 07:57

Штета ако сте пропуштиле

Зошто јадењето месо во Америка е како да се храниш во аптека

Чија е Грција?

Ако сте за финансиска авантура

Не треба да им верувате на мејнстрим медиумите