Вашингтон го обвинува јужниот сосед, но Америка е таа што им дава засолниште и оружје на наркокартелите што го тероризираат Мексико, возвраќа претседателката Клаудија Шејнбаум на обвинувањата од Доналд Трамп за „сојуз на наркобароните со нејзината влада“.
Има организиран криминал и во САД и има Американци со илегални активности во Мексико. Кој инаку би го разнесувал фентанилот во градовите низ САД, прашува Шајнбаум.
Таа своите тврдења ги поткрепува со тазе извештај во кој се наведува дека за време на мандатот на нејзиниот претходник Андрес Мануел Лопез Обрадор, бројот на американски жители уапсени за организиран криминал се зголемил за повеќе од 450 отсто.
Шејнбаум го повика Вашингтон да си го среди дворот ако навистина сака да го запре шверцот на дрога.
Како основна причина за заканите за воведување царини од 25 отсто за мексикански производи, Трамп ја наведе толерантноста на Мексико за шверцот на фентанил и на мигранти преку границата со САД. Царините беа одложени откако Шејнбаум се согласи да испрати засилување од 10.000 војници на границата. Но, и тоа нема многу да помогне, бидејќи картелите имаат разгранета мрежа во САД.
Ги има речиси во секое ќоше низ Америка. Тие се главни за контрола на дрогата и за движењето на наркодоларите, вели Џек Рајли, поранешен шеф на чикашкото одделение на Администрацијата за борба против наркотици (ДЕА) кој смета дека ваквите групи може да се совладаат само со координирани напори од двете земји.
Бившиот агент на ДЕА потврдува дека американски државјани сè повеќе дилаат дрога во Мексико.
Секој што има двојно или американско државјанство може да биде корумпиран или под притисок од картелите. Речиси сè се одвива на патните гранични премини, а не со преминување на Рио Гранде со ранец на грбот, објаснува Рајли.
Претседателката ги обвинува САД и дека ги вооружуваат картелите и се заканува со тужби против Вашингтон за „соучество во организиран криминал“. Мексико тврди дека преку неговата северна граница секоја година се уфрлаат помеѓу 200.000 и 750.000 парчиња огнено оружје произведено во САД. Американското Министерство за правда признава дека 74 отсто од своето оружје, картелите го добиваат од Америка.
Пред половина година американски судија отфрли тужба од мексиканската влада, која побара отштета од 10 милијарди долари од шест производители на оружје во САД, тврдејќи дека се одговорни за убиствата во Мексико предизвикани од нивното оружје. Мексико тогаш ја стесни тужбата и ја концентрираше кон „Смит енд Весон“ и „Интерстејт армс“.
Мексико има еден од најстрогите закони за продажба на оружје во светот. Таму речиси е невозможно легално да се купи пиштол или пушка. Сепак, тоа нема речиси никаков ефект врз крвопролевањето. Откако во 2006 година владата ја ангажираше армијата во војна против наркокартелите, во пресметки поврзани со дрога паднаа 480.000 жртви.
