Виталиј Кличко од говорницата во Парламентот изјави дека Зеленски во услови на војна настојува да концентрира уште поголема моќ во извршната власт и да ја намали автономијата на локалните самоуправи и демократските институции.
Киев е срцето на државата што непријателот се обидува да ја уништи. Но, ништо помалку страшни не се ниту политичарите кои, всушност, исто така ја уништуваат земјата... Каде е противвоздушната одбрана за заштита на главниот град? Каде е заштитата на објектите на „Укренерго“? Каде се милијардите што беа издвоени за ова? – праша Кличко, кој е градоначалник на Киев од 2014 година.
Во извештајот за актуелната состојба во Киев, Кличко истакна дека во текот на оваа година имало речиси 50 напади врз капацитетите за греење и струја, за разлика од 19 лани, но комуналните претпријатија постојано ја поправаат опремата. Градот подготвил речиси 700 генератори за објектите за греење и водоснабдување, 70 мобилни котларници и набавил 6.000 генератори, инвертори и батерии за станбените згради, училиштата и болниците.
Главниот проблем, според Кличко, е одлуката на Владата да ги замрзне средствата за локалните буџети, токму пред почетокот на грејната сезона.
Тие се обидуваат да ја уништат локалната самоуправа во Украина, и тоа не само во Киев, преку отстранување на лидерите на општините, апсурдни обвинувања и заплашувања со кривични постапки, изјави Кличко.
Во Киев канцеларијата на избраниот градоначалник коегзистира со воената управа на градот, која е директно назначена од Зеленски. Оваа двојност создава постојани тензии околу распределбата на одговорностите и контролата врз одбраната и функционирањето на виталните системи.
******
Види и: Кличко ја има сериозно спукано со Зеленски
