„Добро ни одеше“, вели Мохамед Давуд говорејќи за времето пред талибанците да се вратат на власт во Авганистан. За Ројтерс раскажува дека тогаш со една жетва од афион можел цела година да го прехрани семејството. Сега одгледува памук и пченица, кои едвај му обезбедуваат егзистенција и храна за децата. Заработува 40 пати помалку, но тврди дека не ја прекршува забраната.
Полињата со афион во Авганистан произведуваа околу 80% од светскиот опиум, кој се користи во производството на морфиум, но и за хероин и други дроги. Талибанските власти во 2022 година наметнаа строга забрана за производство на опиум, по која исчезнаа полињата со афион.
За одгледување опиумски афион на површина од половина џериб (околу 500 квадратни метри) следува казна од 6 до 12 месеци затвор, уништување на посевите, а понекогаш и јавно камшикување или присилно бричење на главата, согласно шеријатските закони.
Сепак, многумина му се враќаат на афионот. Канцеларијата на ОН за дрога и криминал (UNODC) денеска соопшти дека површината засадена со афион во Авганистан во 2025 година се зголемила четирикратно на 43.300 хектари. Анализа на сателитски снимки покажува дека земјоделците го кријат афионот во полиња со жито или зад ѕидови од кал.
Вкупната површина се уште е далеку од рекордните 177.000 хектари забележани во 2021 година, една година пред талибанците да се вратат на власт, но продажбата на опиум во Авганистан годинава генерирала 525 милиони долари, најмногу по 2018 година, соопшти UNODC.
Одгледувањето пченица едвај ги покрива трошоците. Цените на памукот паднаа за околу две третини поради ненадејната презаситеност, поради војната со Пакистан – главниот купувач на авганистански памук.
Многу земјоделци немаат друг избор освен да се вратат на одгледувањето афион, изјави Полеак Ок Сереи, претставник на UNODC за Авганистан.
Агенции на ОН предупредуваат дека огромниот економски притисок врз земјоделците најмногу се одразува врз децата. И покрај подобрите жетви, во десет од 34-те провинции неухранетоста на децата е на критично ниво, а во идната година кризата може да зафати уште 4 провинции.
