Со модeрните автомобили, животот на возачите им е толку олеснет што дури и не мора да вадат клуч од џеб за да ја стартуваат колата. Но, животот им е олеснет и на крадците, предупредуваат од германската Федерална канцеларија за криминал.
Бројот на украдени автомобили, но и камиони, кампери, како и земјоделски и градежни машини, минатата година експлодираше. Секој ден во Германија исчезнуваат повеќе од 40 возила - вкупно 15.924 кражби, 9% повеќе од претходната година.
Посебно се погодени големите градови како Берлин и Хамбург, а возилото да остане на улица е опасно во областите на источната граница на Германија. Во суштина, камиони се крадат дури и повеќе од автомобили: бројот на нивни кражби е зголемен за над 48%.
Германската полиција е свесна дека бандите се добро организирани и меѓународно поврзани: украденото возило, макар се работело за багер тежок неколку тони или пак комбајн - кои вредат стотици илјади евра - излегува од Германија за само неколку часа по кражбата.
Во германската осигурителна асоцијација посочуваат дека единствена заштита за сопственикот е осигурувањето на возилата, но поради зголемениот број на кражби се зголемуваат и цените на осигурувањето.
