Потребни состојки:
- свинско филе
- кашкавал
- шунка
- сланина
- кајмак
- јајца
- брашно
- презла
Викендов го поминав во Галичник. Беше ненормално ладно. Не излегов од хотел и цело време го поминав во кујна, дека таму топло, не за друго (хехе).
Направив неколку работи, а за денес решив да го споделам овој рецепт. Караѓорѓева шницла. Ммм, со све внатре! Инаку многу ме интересираше зошто се вика, како што се вика, и дознав дека е - според Караѓорѓе! Умна таа :) Има некои објаснувања зошто и како е добиено името по српскиот принц, но јас во мојата глава имам една теорија и мислам дека ќе си ја задржам за себе :))))))
Да не должам многу, ако сте многу гладни и ве служи апетитот, ова е правото јадење за вас!
Чекори за подготовка:
- Земете едно свинско филе и отворете го на пола по должина, за да добитете поголема површина.
- Ставете го на работна површина, врз него една ќеса и почнете да го лупате со чук. Ако некој ве има изнервирано, ова ќе ви дојде како супер терапија. Треба да ја зголеми дупло површината и да биде многу тенко. Отприлика волку големо.
- Посолете ја убаво шницлата, поделете ја на пола и почете да ја полните. Јас направив две различни. Едната ја наполнив со шунка, кашкавал и сланина. Другата со сланина и кајмак.
- Сролајте ја убаво и обрнете внимание на краевите, треба да ги пикнете внатре за да не истече кашкавалот при пржење.
- Така свиткана спремете ја за поховање.Систем брашно, јајце и презла.
- Пржете ги малку подолго и на не толку јак оган. Ова ви го кажувам затоа што може да ви изгоре презлата и да мислите дека се готови, а всушност внатре ќе ви бидат живи.
- Извадете ги на хартиен бришач, да се собере мрснотијата и секако, послужете со помфрит, тартар сос и лимон по желба. Уживајте.
