Потребни состојки:
- ориз 1 шоља
- спанаќ 1 кг
- млад кромид
- црвен пипер
- вегета (не ја користам ич, ама овде оди)
- бибер
- масло
Рецептов е направен уште пред две недели, но некако немав време да го ставам. Енивеј, со сестра ми и внук ми бевме во парк. Ние си правевме пикник, а он си бркаше гулаби! ❤
Дојдовме дома и ја слушам како по телефон се договара за некоја испорака. Кажува адреса каде да стигне, го води курирот по уличкиве низ Карпош. Ѕвони врата, му отвара и се изнервирува дека требала да доплати 120 денари за достава. Влегува во соба, јас си лежам со внук ми и ја прашувам:
- Шо ти е ма тоа?
- Ништо бе, си нарачав нешто од интернет пред два месеца. (го отвара кутивчето)
- Добро, ќе каеш што е?!
- Ланче ма! (ме погледна тапо)
- Какво ланче ма?! 😂
Го става на врат, го закопчува и се врти:
- Софка, дали сум бе здрава?!
- 😂😂😂😂😂😂 ти си бе девојче без памет!
Јас, просто немам зборови како да го опишам ланчето, но не е битно тоа, битно е што ни самата не е сигурна зошто го нарачала! А уште побитно е, што ми го продолжува животот со смеење на секоја наша средба. ❤
Внук ми заспа, сестра ми отиде до Сити мол, а јас конечно седнав да го напишам рецептов.
Чекори за подготовка:
- Во тенџерче по ваш избор ставете масло да се загрее и ставете го зелениот дел од младото кромитче. Се разбира исецкано; пропржете го.
- Додадете го оризот.
- Запржете го и него и повторно промешајте. Оп, еве го и мојот асистент. ❤
- Додадете една лажица црвен пипер и една лажица вегета.
- Нека се пропржат и тие малку и додадете 500 мл врела вода.
- Многу ми се допаѓа што во ова јадење не се чисти спанаќот од дршките, само коренот се вади. Исецкајте го и ставете го во тенџерчето.
- Убаво промешајте додека не омекне и не се намали по волумен и покријте го тенџерчето со капак, но не скроз.
- На тивко нека си крчка околу 30 минути. Кога ќе биде готов, послужете го во тањир заедно со кисело млеко и со пржено јајце. На здравје!
