Потребни состојки:
- црвена леќа 100 г
- томатело (со босилек) 500 мл
- кромид
- лук
- морков
- путер (за тие што не постат)
- маслиново масло
Има денови кога душичката ќе ти посака манџа. Онака, ти се јаде нешто манџесто, нешто во течна состојба и нешто што не е месо, пица и слично. Најубавото во овој рецепт е што се прави за 20 минути, максимум 30. Башка, превкусно е! Знам дека ве има повеќе што не јадете леќа, грашок, боранија и знам дека секогаш ги избегнувате овие ручеци, но овојпат ве советувам да си дадете шанса, т.е. да ѝ дадете шанса на оваа превкусна леќа.
За вас што постите, супер ручек, но се разбира путер нема да ставате!
За вас што не постите, а ви се јаде манџичка, терајте со путерот и немој да заборавите едно убаво парче овчо сирење!
п.с. Пак ми се наопаку сликите! Е ме полудеа значи!
Чекори за подготовка:
- Земете пола главица кромид и исецкајте ја ситно. Јас така ја исецкав, а вие сецкајте го како сакате. Исецкајте и едно чешне лук и ставете ги во загреано масло. Рерната нека не ви биде на најјако од причина да не ви загори кромидот.
- Земете еден голем или два помали моркова, исчистете ги, исецкајте ги на кругови и додадете ги кај кромидот.
- Пропржете убаво сè заедно и додадете ја леќата.
- Откако ќе измешате сè убаво, за тие што не постат, ставете едно убаво парче путер, а за тие што постат само додадете уште малку маслиново масло.
- Земете го томателото, убаво протресете го пред да го отворите и ставете малку повеќе од пола. Зборувам за она што е од пола литар.
- На тивко оставете нека си крчка и зачинете со сол и бибер. По ваш вкус може да го додадете кој било зачин. Бидејќи ќе биде многу густо, додадете една чаша врела вода. Пробајте какво е на вкус и оставете да си се вари 15-20 мин или пробајте кога е готова леќата. Бидејќи станува збор за црвена леќа, не ѝ треба повеќе од 30 мин. Исклучете ја ринглата, покријте го тенџерчето со капак и послужете кога ќе бидете спремни за јадење. Од леќа, само оваа!!!
