Сеирџиите предвидоа, чекаа и дочекаа. Претседателот Трамп и милијардерот Маск веднаш штом ја прекинаа врската од интерес се спукаа со лични навреди и политички обвинувања. Со гнасотии, лудаци, епштајни, импичменти, дијагнози, сè до тесли и вселенски бродови. Кој знае колку тешко им било да се воздржуваат во 129-дневното пријателство. Давајте од тоа пуканките.

Доналд Трамп ѝ нареди на администрацијата да спроведе истрага за постапките на Џо Бајден како претседател, за да се утврди дали некој од неговите најблиски помошници го прикривал неговиот нарушен когнитивен капацитет и го злоупотребувал за да потпишува документи во негово име. Ако тоа биде потврдено, ќе се создаде основа за поништување на низа одлуки на Бајден.

Администрацијата на претседателот Трамп ги поништи барањата до итните служби низ САД да им овозможат итни абортуси на жени на кои им е загрозено здравјето, дури и во сојузните држави што го забрануваат тоа. Политиката ја воведе поранешниот претседател Џо Бајден во 2022 година, веднаш откако Врховниот суд го поништи правото на абортус на национално ниво. 

Не се чекаше многу Маск да распали по Трамп откако ја напушти Белата куќа. Милијардерот го нападна клучниот закон за даноци и трошоци на својот довчерашен пријател како „одвратна гнасотија“ поради претераното кревање на дефицитот. Најави и политичка одмазда: Ги повика Американците да не гласаат за „предавници“. Всушност Маск е фрустриран зашто му се загрозени бизнисите.

Одлуката на Трамп да им воведе царини и на непријателите и на сојузниците на САД ја разниша довербата во доларот. Тоа ги поттикна европските амбиции еврото да го замени доларот како глобална резервна валута. Претседателката на Европската централна банка Кристин Лагард го изложи својот план, но Европа се уште нема капацитет за да биде водач на финансискиот свет.

Новата зелена индустрија е на пат до крајот на годинава да отстрани повеќе од 1 милион тони CO2 од атмосферата. Тоа се чини како голем успех, но во реалноста нема никакво влијание врз климата. За да се постигне некаков ефект, чистењето мора да биде илјадници пати побрзо. Тешко, бидејќи ни компаниите што поставија сопствени климатски цели не вложуваат во технологиите. 

Дел легално и дел со заобиколување на забраните за извоз, Русија се уште им продава гас и нафта на западните земји што ѝ воведоа санкции и со заработените стотици милијарди ја финансирала војната во Украина. Нови податоци укажуваат дека европските сојузници на Киев ѝ дале три пати повеќе пари на Русија за нафта и гас отколку што издвоиле како помош за Украина.

Федерален суд во Њујорк ги блокира тарифите што Трамп на 2 април ги воведе за речиси сите земји во светот. Немал право да го прогласи трговскиот дефицит за вонредна состојба. Додека не се произнесе Врховниот суд ќе висат царините што ја нарушија глобалната трговија, ги потресоа финансиските пазари, принудија земји да се пазарат и компании итно да прекројуваат планови.

Универзитетите ширум светот секогаш си „краделе“ таленти, но регрутирањето сега е концентрирано кон САД, откако елитните колеџи беа притиснати од администрацијата на Трамп. Универзитети од Хонг Конг, Франција, Австралија и Германија, во трката да привлечат умови од Харвард, го нудат она со кое Америка некогаш се истакнуваше во светот: академската слобода.

Шест месеци откако на изборите претрпеа катастрофален пораз, американските демократи се организираат за да ги откријат причините зошто се отуѓиле од сопствената гласачка база. Партиските лидери во луксузни хотели направија стратегија како да си го пронајдат сопствениот 'рбет и спремни се да потрошат милиони за да проучат зошто одамна го изгубиле.

Мировната иницијатива на Доналд Трамп за да запре војната во Украина сепак се покажа само како затишје пред бура. Германскиот канцелар Фридрих Мерц изјави дека Западот ги исцрпил сите дипломатски средства и преминува кон воена поддршка за Киев. Сојузниците ќе ѝ доставуваат долгострелно оружје на Украина со дозвола да гаѓа цели длабоко на територијата на Русија.