Offside › Набрзинка

Работнички одбележи голем јубилеј: 80 години од првиот натпревар

5 август 2026

Кошаркарскиот клуб Работнички одбележа значаен јубилеј – 80 години од одигрувањето на својот прв официјален натпревар. На 2 август 1946 година, на големиот православен празник Свети Илија и државниот празник Илинден, започнало првото кошаркарско првенство на Македонија, организирано во рамките на Вториот фискултурен слет. На турнирот настапиле екипите на Македонија, Работнички и Ванчо Прке од Штип.
Работнички во својот дебитантски настап го совладал Ванчо Прке со 30-8, по што штипскиот тим се повлекол од натпреварувањето. Натпреварите се играле на импровизиран терен поставен на Градскиот стадион во Скопје. Линиите биле исцртани со вар, кошевите биле изработени од железо без мрежички, а наместо кошаркарска се користела одбојкарска топка. Во тоа време не се досудувале лични и технички грешки, немало тајм-аут, а натпреварите траеле 40 минути, поделени на две полувремиња по 20 минути. За Работнички на историскиот натпревар настапиле Славко Матовски, Драган Луковски, Трајан Ивановски, Борис Анастасов, Атанас Радевски, Војче Димитровски и Илија Ќовкаров.
Во текот на својата богата историја, Работнички изгради статус на најтрофеен македонски кошаркарски клуб. Во поранешната СФР Југославија одигра 18 сезони во елитното првенство и трипати заврши на петтото место, а стигна и до полуфинале на Купот „Радивој Кораќ“, финале на Купот на Југославија, како и до завршниците на најсилните домашни натпреварувања.
По осамостојувањето на Македонија, клубот освои рекордни 15 шампионски титули, 10 национални купови и два Суперкупа, а бележеше и значајни настапи на европската сцена, меѓу кои четвртфинале во ФИБА Европскиот куп, пласман меѓу осумте најдобри во ФИБА Европа купот и финале во БИБЛ-лигата.

извор

Како да не му продолжиш договор на играч со скоро 150 гола во три сезони?

5 ноември 2026

Баерн Минхен го продолжи договорот со добитникот на „Златната топка“, Хари Кејн, до 30 јуни 2029 година.
Англискиот напаѓач направи растур систем во дресот на германскиот гигант за кој има 156 гола на 161 натпревар. 146 во првите три сезони и 10 во оваа.
Со Баерн освои бројни трофеи, меѓу и наградата за најдобар стрелец во Бундеслигата во секоја сезона, а оваа година беше прогласен и за фудбалер на годината во Германија. Двапати ја освои „Златната копачка“, а пред неколку дена и Златната топка.
Капитенот на англиската репрезентација кој настапува во Минхен од летото 2023 година, освои две титули во германското првенство и Купот на Германија, како и два германски Суперкупа.

извор

Лазаров: Нè чека пеколен меч со Грција!

5 ноември 2026

Македонската ракометна репрезентација на најдобар начин ги започна квалификациите за Европското првенство во 2028 година, откако го декласираше Луксембург со 41-23.
„Не ми е најважен резултатот, туку пристапот и начинот на кој игравме. Имавме темпо во текот на сите 60 минути, што воопшто не е лесно за нашите македонски услови, без разлика што противник беше Луксембург. Им честитам на момците за сработеното“, заклучи Лазаров.
„Имаме три дена до натпреварот со Грција, каде што нè очекува пеколен меч против одлична репрезентација. Ќе пристапиме максимално сериозно и мораме да бидеме подготвени за сите можни сценарија. Ќе се обидеме психолошки да се подготвиме за она што нè очекува“, порача селекторот.

извор