Offside › Набрзинка

Нови мундијалски рекорди на Роналдо и Меси во иста ноќ

15 октомври 2025

Како беше она, вода стои, Роналдо и Меси не стојат. И на 40 и 38 години, гајле немаат со кондиција и форма и ги поместуваат границите во светскиот фудбал.
Португалецот против Унгарија постигна два гола (број 947 и 948 во кариерата) и стигна до 41 гол во квалификациите на Светските првенства, што е рекорд. Втор е Карлос Руиз од Гватемала со 39, а Меси е трет со 36.
Аргентинецот пак на мечот со Порторико асистираше два пати и стигна до рекордни 60 асистенции во историјата на репрезентативниот фудбал. Го мина Нејмар кој има 59, а Ландон Донован има 58.

7 ноември 2025

Ждрепката за плејоф натпреварите за пласман на Светското првенство во САД, ќе се одржи на 20 ноември во Цирих, со почеток во 13 часот, соопшти ФИФА.
16 репрезентации поделени во четири секции ќе играат во европскиот плејоф. 12 второпласирани од квалификациските групи плус 4 победници од групите во Лига на нации.
Ќе се играат четири турнири во периодот 23-31 март, со полуфинале и финале, а само победниците ќе одат на СП.
Македонија е блиску до место во баражот преку Ј групата. Ако на 18 ноември загуби од Велс на гости, тогаш во плејоф ќе оди преку Лига на нации.

7 ноември 2025

Ракометниот клуб Вардар 1961 слави голем јубилеј - 65 години од неговото постоење. Во чест на роденденот, управата на „црвено-црните“ реши да претстави ново официјално лого кое симболично ја отсликува историјата и славното минато на големиот Вардар, и до крајот на јубилејната сезона ќе ги краси дресовите на двократниот европски шампион.
Во таа насока, клубот ги поканува сите навивачи на дерби натпреварот против Алкалоид, кој ќе се одигра во недела во ракометниот храм „Јане Сандански“ со почеток во 18:30 часот. Продажбата на билети се врши онлајн како и на билетарницата пред салата.