- На последната редовна седница на одборот на директори на ФК Вардар, донесена е одлука цените на билетите за домашните натпреварите да бидат 200 денари за Југ и 100 за Исток.
- Првичната идеја на управата на клубот била картите да се продаваат по 300, но Комити имале барање да се намалат кое им го прифатиле.
- „Јужната трибина е Вардарова трибина! Место кое речиси 80 години ги обединува сите генерации на навивачи, место на кое барем еднаш стапнал секој од нас, место за сите Вардарци! Во борбата за титула, потребни сме сите! Полн Градски за клубот на народот“, стои во соопштението на Комити
- Дарко Панчев се расплака на промоцијата на биографската книга посветена на легендарниот фудбалер Васил Рингов „Фудбал под сенка“, чиј автор е новинарот Срѓан Ивановиќ. Тој сподели приказни за Рингов кој почина лани на 23 декември и рече дека бил лидер на две генерации во ФК Вардар.
- „Тој опфати две генерации, една постара, и потоа продолжи да игра и со нас помладите кои се вклучивме по пет-шест години. И многу е битно дека тој беше лидер во двете генерации. Беше исклучително интелигентен, паметен и забавен. За играчките способности не се зборува, феноменален играч“.
- „Васе, јас и Горде Здравков кој исто е тука, како напаѓачка тројка напред бевме најефикасни во тоа Југословенско првенство една година. И навистина бевме страв и трепет, и беше големо задоволство да се игра со него. За неговите човечки врлини, синот Марио и фамилијата знаат повеќе, но и ние многу добро го знаеме и навистина беше топ човек, рече фудбалаката легенда низ солзи“.
- Најдобриот македонски атлетичар Дарио Ивановски направи фантастичен успех и уште еднаш покажа дека е во врвна форма откако на големиот маратон во Белград заврши како второпласиран со време од 2:09:35. Дарио не постави свој личен рекорд но ова е фантастичен резултат ако се земе предвид големата конкуренција на српскиот маратон.
- Прв на Белградскиот маратон заврши Гемсиса Гада од Етиопија со рекорд на патеката од 2:08:08. Третото место го освои Кениецот Јохана Ерот кој после долго водство на патеката заостанал во последните пет километри и трката ја завршил со 02:09:55.
- Дарио Ивановски имаше одличен втор дел од трката каде од четвртото место успеа да стигне до втора позиција. Годинава белградскиот маратон кој е еден од најголемите во Европа, имаше изменета траса. Белград ќе биде и домаќин на Европското првенство во трчање во 2027-ма година, а Белградскиот маратон оваа година беше во изменет формат односно полумаратонот и трката на 10 километри се одржаа ден порано, во саботата, пред главниот настан маратонот во неделата. Оваа манифестација послужила како генерална броба пред Европското првенство.
- Ивановски е олимписки стипендист на Македонскиот олимписки комитет.
