- Рафаела Пимента му беше најблиска соработничка на легендарниот супер агент Мино Рајола. По неговата ненадејна смрт во 2022-ра, Бразилката Пимента ги презеде обврските околу неговите клиенти, воглавно сите светски ѕвезди.
- Во меѓувреме Пимента успеала и да договори трансфер на младиот Србин Лазар Самарџиќ од Удинезе во Интер. Тоа требаше да биде еден од најинтересните трансфери во летниот преоден рок, но таткото на играчот, Младен Самарџиќ наводно барал уште бонуси и пари, рекол дека тој никогаш не ја овластил Пимента да биде посредник и Интер се повлекол од целата зделка.
- Пимента потврдила дека таткото на Лазар е виновник за пропаднатиот трансфер а истото го потврди и прославениот фудбалер Александар Коларов. „Јас ги запознав со неа и таа среди се околу трансферот. Младен кажува многу лаги. Тој лаже“, рекол Коларов.
- Новак Ѓоковиќ објави дека негов нов тренер кој ќе го спрема за Австралија Опен и за некои други турнири е неговиот добар другар од детство и долгогодишен ривал на тениските терени Енди Мареј.
- Легендарниот шкотски тенисер ја заврши својата богата кариера на Олимписките Игри во Париз а сега ќе заплива во тренерски води и ќе соработува со Новак Ѓоковиќ.
- Србинот и Мареј во кариерата одиграа 36 меѓусебни дуели. Ѓоковиќ славеше на 25 меча а 11 пати подобар беше Мареј. Енди во кариерата освои две титули на Вимблдон и една на УС Опен а има и две олимписки злата кои ги освои во 2012 и 2016.
- „Возбуден сум што еден од моите најголеми ривали ќе биде со мене од иста страна на мрежата, овојпат како мој тренер. Се радувам што сезоната ќе ја започнам заедно со Енди и што ќе биде со мене баш во Мелбурн каде делевме многу исклучителни моменти во кариерата“, изјави Новак Ѓоковиќ.
- Во самиот финиш од мечот Романија - Косово во Лига на Нации, гостинските фудбалери во 90' минута кога сфатија дека немаат веќе шанса за прво место за кое им требаше победа од најмалку три гола разлика, при резултат 0-0 решија да го напуштат теренот поради тоа што домашните навивачи им скандирале „Косово е Србија“.
- УЕФА неколку дена го разгледуваше случајот, а на крајот пресуди Романија службено да го добие мечот со победа од 3:0. Косовскиот фудбалски сојуз е казнет и со 6.000 евра парична казна поради тоа што репрезентативците ги одбивале повиците на делегатот да се вратат на теренот и да го довршат мечот.
- Романија ќе мора да плати 128.000 евра и еден меч ќе мора да игра без присуство на публика поради односот на своите навивачи.
